ދިވެހިރާއްޖޭގެ އިމާމުންނަށް ދިމާވާ ދަތިތަކަށް ހައްލު ހޯދުމަށާއި، އިމާމުންގެ ޚިޔާލާއި މަޝްވަރާ ހޯދުމަށާއި އިމާމުންނަށް މުހިއްމު ފިލާވަޅުތަކެއް ނަގައިދިނުމަށް އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދިޔަ އިމާމުންގެ މަހާސިންތާގައި ނިލަންދޫގެ ހަތަރު މިސްކިތުގެ އިމާމުންވެސްވަނީ ބައިވެރިވެފައެވެ. އިސްލާމިކް މިނިސްޓްރީގެ ފާރަތުން މާލޭގައި އަދި ހަމައެހެންމެ އޮންލައިންކޮށް ކުރިޔަށް ގެންދެވުނު ސެޝަންތަކުގައިވެސް ނިލަންދޫގެ އިމާމުން/މުދިމުން ވަނީ ބައިވެރިވެފައެވެ. އެހެންކަމުން ރާއްޖޭގައި ބޭއްްވުނު ފުރަތަމަ މަހާސިންތާގައި ބައިވެރިވި ނިލަންދޫގެ ހަތަރު މިސްކިތުގެ އިމާމުންނަކީ އަބްދުﷲ އަލީ (ހުކުރު މިސްކިތް)، އިބްރާހީމް އަބްދުއްރައްޒާގު( މަސްޖިދުއް ތަޙާލުފި)، އަޙްމަދު މުޖުތަބާ(މަސްޖިދުއް ސަލާމް) އަދި އަބްދުﷲ އަޙްމަދު (މަސްޖިދުލްވަޙްދާ) އެވެ.
ޖުމްލަކޮށް ފަސް ދަންފަޅިޔަކަށް ބަހާލެވިގެން ކުރިޔަށް ގެންދެވުނު މި މަހާސިންތާގައި އިސްލާމީ ކަންތައްތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ނަންގަވައިދެއްވި ހާއްސަ ދަންފަޅިއަކާއި އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފްގެ ހާއްސަ ދަންފަޅިއެއްގެ އިތުރުން، އިމާމުންނަށް ސިވިލް ސާވިސްގެ ޤަވާއިދުތައް ކިޔަވައިދިނުމަށްވެސް ހާއްސަ ދަންފަޅިއެއް ކުރިއަށް ގެންގޮސްފައިވެއެވެ. މީގެ އިތުރުން އިމާމުންނަށް ފިޤުހީ ގޮތުންނާއި އިދާރީ ގޮތުން މުހިއްމު މަޢުލޫމާތުތައް ދިނުމަށް ޕެނަލް ޑިސްކަޝަނެއްގެ އިތުރުން އިމާމުންގެ ޚިޔާލާއި ލަފާ ހޯދުމަށްވެސް ހާއްސަ ދަންފަޅިއެއް ކުރިއަށް ގެންގޮސްފައިވެއެވެ.
މި މަހާސިންތާ ބޭއްވުނު އެންމެ މުހިންމު އެއް މަޤްސަދަކީ ދިވެހިރާއްޖޭގައި މަސައްކަތްކުރަމުންދާ އިމާމުން އެއް ޕްލެޓްފޯމަކުން ބައްދަލުވެ އެކަކު އަނެކަކަށް ތަޢާރަފްވެ، އިމާމުންނަށް ހުރި ގޮންޖެހުންތަކާއި ދަތިތަކާއި ބެހޭ ގޮތުން ފުޅާ ދާއިރާއެއްގައި މަޝްވަރާ ކުރުމާއި އިމާމުންނަށް ޤުރްއާނާއި، ތަޖުވީދުގެ ޢިލްމާއި ތަފްސީރާއި، ފިޤުހާއި، ޙަދީޘާއި، އަޤީދާގެ ޢިލްމުގެ ދާއިރާއިން އިމާމަކަށް ބޭނުންވާ މުހިއްމު ޢިލްމީ މަޢުލޫމާތުތައް ހިއްސާކުރުމާއި މިސްކިތްތައް ބެލެހެއްޓުމުމުގެ ގޮތުން އަދާކުރަންޖެހޭ މަސްއޫލިއްޔަތުތަކާއި އެ މަސްއޫލިއްޔަތުތައް އާދަކުރުމުގައި ހުރި ގޮންޖެހުންތަކާއި އަދި އިމާމުން އިތުރަށް ތާޒާކުރުމާއި އިމާމުންގެ ކަންބޮޑުވުންތައް އަޑުއަހާއި މަޝްވަރާކުރުމަށްޓަކައި ބޭއްވުނު މަޙާސިންތާއެކެވެ.