ދުނިޔޭގެ ކާބޯތަކެތީގެ ރައްކާތެރިކަމުގެ ދުވަސް ފާހަގަކުރުމުގެ ގޮތުން މިރަށުގައި ބޭއްވުމަށް ހަމަޖެހިފައިވާ ހާއްސަ ރަސްމިއްޔާތާއި ހަރަކާތްތަކާ ގުޅޭގޮތުން ރަށުގެ ރައްޔިތުންނާ ބައްދަލުކޮށް މުހިންމު މަޢުލޫމާތުތަކެއް ހިއްސާކޮށްފިއެވެ.

މި ބައްދަލުވުމުގައި ހޮސްޕިޓަލުގެ ޑިރެކްޓަރ ހެލްތް ކެއަރ އެޑްމިނިސްޓްރޭޝަން އަޙްމަދު އަރީފް އަދި ކައުންސިލްގެ ރައީސް ޢަލީ އަޙްމަދު ވަނީ ވާހަކަދައްކަވާފައެވެ.

ހޮސްޕިޓަލުގެ ޑިރެކްޓަރ އަޙްމަދު އަރީފްގެ ވާހަކަފުޅު:

މި ދުވަހާ ގުޅިގެން ރަށުގައި ގިނަ ހަރަކާތްތަކެއް ކުރިއަށްދާނެކަން ފާހަގަކުރައްވައި އަޙްމަދު އަރީފް ވަނީ ހަރަކާތްތަކުގެ ތާވަލު ހިއްސާކުރައްވާފައެވެ.

• ހުކުރު ދުވަސް (ޑޯރ-ޓު-ޑޯރ ސެޝަން): ރަށުގެ 50 ގެއަކަށް ހެލްތު މިނިސްޓްރީގެ މުވައްޒަފުން ޒިޔާރަތްކޮށް، ގޭގޭގައި ކާބޯތަކެތި ތައްޔާރުކުރާ ތަންތަނުގެ ސާފުތާހިރުކަން ހުރިގޮތް ބަލައި، ހޭލުންތެރިކުރުމުގެ ސެޝަންތަކެއް ކުރިއަށްދާނެކަމަށް ވިދާޅުވިއެވެ.
• ހޮނިހިރު ދުވަސް (ކުޑަކުދިންގެ ހަވީރު): ރަށުގެ ސްޓޭޖް ސަރަހައްދުގައި ކުޑަކުދިންނަށް ހާއްސަ ހަވީރެއް މާލޭއިން ރަށަށް އަންނަ ޓީމްގެ ފަރާތުން ބޭއްވުމަށް ވަނީ ހަމަޖެހިފައިވާކަން ފާހަގަ ކުރެއްވިއެވެ.
• އާދިއްތަ ދުވަސް (ރަސްމީ އިއްޒަތްތެރިންގެ ޒިޔާރަތް): ދިވެހިރާއްޖޭގެ ފަސްޓް ލޭޑީ (ރައީސުލްޖުމްހޫރިއްޔާގެ އަނބިކަނބަލުން) ގެ އިތުރުން، މިނިސްޓަރ އޮފް ހެލްތާއި ޑަބްލިއު.އެޗް.އޯ (WHO) އިން ދިވެހިރާއްޖެއަށް ކަނޑައަޅުއްވާފައި ހުންނަވާ މަންދޫބު ރަށަށް ވަޑައިގެން ހާއްސަ ރަސްމިއްޔާތެއް ބޭއްވުމަށް ހަމަޖެހިފައިވާކަން ފާހަގަ ކުރެއްވިއެވެ. އެހެންކަމުން ހުރިހާ ރައްޔިތުން ނިކުމެ އެބޭފުޅުންނަށް ފުރިހަމަ މަރުހަބާއެއް ދެންނެވުމަށް އެދިވަޑައިގަތެވެ.
• 8 އާއި 9 ޖޫން : މި ދުވަސްތަކުގައި ”ސަމާވަރު“ ނަމުގައި ހާއްސަ ތަމްރީނު ޕްރޮގްރާމެއް ކުރިއަށް ގެންދަން ހަމަޖެހިފައިވާކަން ފާހަގަ ކުރެއްވިއެވެ.

ކައުންސިލް ރައީސް ޢަލީ އަޙްމަދު ދެއްވި މެސެޖު:

ކައުންސިލްގެ ރައީސް ޢަލީ އަޙްމަދު ވަނީ ރަށަށް އަންނަ މެހެމާނުންނަށް މަރުހަބާ ކިޔުމުގައި މިރަށަކީ އަބަދުވެސް ނަމޫނާ ރަށެއްކަން ފާހަގަކުރައްވައި، މިފަހަރުވެސް ފަސްޓް ލޭޑީ މެޑަމް ސާޖިދާއާއި ވަފުދަށް އެ ނަމޫނާ ދެއްކުމަށް ގޮވާލައްވާފައެވެ. މީގެ އިތުރުން ރަށުގެ ސާފުތާހިރުކަމާ ގުޅޭގޮތުން ތިން މުހިންމު ކަމަކަށް ރައްޔިތުންގެ ކިބައިން އެދިވަޑައިގަތެވެ. އެގޮތުން މުޅި ރަށުގެ ސާފުތާހިރުކަން ކަށަވަރުކުރުމަށްޓަކައި ހުރިހާ ރައްޔިތުންގެ އެއްބާރުލުން ބޭނުންވާކަން ފާހަގަ ކުރެއްވިއެވެ. އަދި ގާނޫނުން މިހާރު ކުނި ވަކިކުރުން މަޖުބޫރުކޮށްފައިވާއިރު، ގޭގޭގައި ކުނި ވަކިކުރުމަށް ސަމާލުކަން ދެއްވުމަށް އެދުނެވެ. މީގެ ސަބަބުން ކުނި މެނޭޖްކުރާ މުވައްޒަފުންގެ މަސައްކަތުގެ ބުރަ ވަރަށް ބޮޑަށް ލުއިވެގެންދާނެކަން ފާހަގަ ކުރެއްވިއެވެ.

ރަށުގެ ކުރިއެރުމަށާއި، ރަށަށް ލިބޭ މިފަދަ ބޮޑެތި ފުރުސަތުތަކުގައި ހުރިހާ ރައްޔިތުންގެ ފުރިހަމަ އެއްބާރުލުން ދެއްވުމަށް ކައުންސިލާއި ހޮސްޕިޓަލުގެ ފަރާތުން ނިންމާލަމުން އިލްތިމާސްކުރެއްވިއެވެ.