Author: CouncilUser01

ނިލަންދޫ ދާއިރާގެ ޢިއްޒަތްތެރި މެމްބަރު، ފާތިމަތު ސައުދާ މިއަދު ދާއިރާގެ ދެ ރަށަށް ވަޑައިގަންނަވައިފިއެވެ. މިގޮތުން މިއަދުގެ ހެނދުނު ނިލަންދޫއަށް ވަޑައިގެން ސިޔާސީ އިސް ފަރާތްތަކާއެކުވަނީ ބައްދަލުކުރައްވާފައެވެ. މި ބައްދަލުކުރެއްވުމުގައި، ރައްޔިތުންގެ ފަރާތުން ހުރި ކަންބޮޑުވުންތައް އޮޅުންފިލުންވައި މިވަގުތު ރައްޔިތުންނަށް އެންމެ ދަތިވާ ކަންކަމާ ގުޅޭގޮތުން މައުލޫމާތު އޮޅުންފިލުއްވިއެވެ. މީގެ އިތުރުން މިހާރު ރަށުގައި ކުރިއަށްދާ އެކިއެކި މަޝްރޫއުތަކާގުޅޭ މައުލޫމާތުތައް އޮޅުންފިލުއްވައި، މަޑުޖެހިފައިވާ ބައެއް މަސައްކަތްތަކުގެ މައުލޫމާތު ބައްދަލުވުމުގެ ބައިވެރިންނާ ހިއްސާކުރެއްވިއެވެ.

ފ.އަތޮޅު ސްޓޭޓް ހައުސްގައި ކުރިއަށްދިޔަ މި ބައްދަލުކުރެއްވުމުގައި، މިއަދުވެސް ނިލަންދޫގެ ރައްޔިތުންނަށް ކުރިމަތިވެފައިވާ އެންމެ ބޮޑު ގޮންޖެހުމަކީ ރަށުގެ ނަރުދަމާ ނިޒާމްގެ މައްސަލަކަން ކައުންސިލްގެ ރައީސް އަލީ އަހުމަދު ފާހަގަކުރެއްވިއެވެ. މިގޮތުން ނިމިދިޔަ ވިއްސާރައިގެތެރޭގައި އެއުނދަގޫ އިތުރުވެގެންދިޔަ ކަމަށާއި، ނަރުދަމާ ނިޒާމްގެ ހާލަތު ރަނގަޅުވެ، އޭގެ ލުއިފަސޭހަކަން ރައްޔިތުންނަށް ލިބޭނެ ދުވަހަކަށް މުޅި ރައްޔިތުންވެސް އިންތިޒާރު ކުރައްވާކަމަށް ކައުންސިލްގެ ރައީސް ވިދާޅުވިއެވެ. ރައީސްގެ ވާހަކަފުޅުގައި، ރަށުގެ ކަރަންޓުގެ ޙާލަތު ރަނގަޅު ކުރަންޖެހިފައިވާކަމަށާއި، މަގުތައް ހެދުމުގެ މަޝްރޫވެސް ވީހާވެސް އަވަހަކަށް ފައްޓަވައިދެއްވުމަށް އެދޭކަމުގައި ވިދާޅުވިއެވެ. އަދި މީގެ އިތުރުން ރަށުގައި މިހާރު ކުރިއަށްދާ ތަރައްޤީގެ އެކިއެކި މަޝްރޫޢުތައް ވީހާވެސް އަވަހަށް ނިމި، އެކަމުގެ ފޮނިމީރުކަން ދެކެން ރައްޔިތުން ބޭނުންވާކަމުގައި ވިދާޅުވިއެވެ.

މެމްބަރު ސައުދާގެ މިދަތުރުފުޅުގައި، ނިލަންދޫގައި ގާއިމްކުރުމަށް ނިންމާފައިވާ މަސްފެކްޓްރީ އާއި ނިލަންދޫ އެއަރޕޯޓުގެ މަޝްރޫއާ ގުޅޭ ފަހުގެ މައުލޫމާތުތައްވެސް އޮޅުންފިލުއްވިއެވެ. އަދި ސަރުކާރުގައި ދަންނަވައިގެން ރަށުގައި ކުރިއަށްދާ ހުރިހައި މަޝްރޫތަކެއްވެސް މަޑުނުޖެހި ކުރިއަށްގެންގޮސް ނިންމަވާދެއްވުމަށް މަސައްކަތް ކުރައްވާނެކަމަށް ވިދާޅުވިއެވެ.

ސަރުކާރުގެ ފަރާތުން ނިލަންދޫގައި އެޅުމަށް ނިންމާފައިވާ މަސްފެކްޓަރީގެ ޢަމަލީ މަސައްތަކް ވަރަށް އަވަހަށް ފެށިގެންދާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ނިލަންދޫ ދާއިރާގެ ޢިއްޒަތްތެރި މެންބަރުގެ އެދިލެއްވުމަކަށް މިނިސްޓަރާއެކު އެމިނިސްޓްރީގައި ބޭއްވި ބައްދަލުކުރެއްވުމުގައެވެ. މި ބައްދަލުކުރެއްވުމުގައި، މަސްފެކްޓަރީ އެޅުމަށް މިހާރު ނިންމާފައިވާ ސަރަހައްދުތަކުގައިހުރި އާންމު ރައްޔިތުންގެ މަސްކައްކާ ބަދިގެ ތަކާއި އެހެނިހެން ބައެއް ވިޔަފާރިތައް، ރަށުގެ އެހެން ސަރަހައްދުތަކަށް ބަދަލުކުރުމާ ގުޅޭގޮތުންނާއި ބަދަލު ދިނުމުގައި ދެވެން އޮތް އެހީތެރިކަމާ ގުޅޭގޮތުންވެސް މަޝްވަރާ ކުރެއްވިއެވެ.

މިބައްދަލުކުރެއްވުމުގައި މަސްފެކްޓަރީގެ އަމަލީ މަސައްކަތް ފެށުމަށްޓަކައި ވާންޖެހޭ ތައްޔާރީތައް މިހާރުވެސް ވަމުންދާ ކަމަށާއި އެގޮތުން މި މަހުގެ ފަހުކޮޅު ޗައިނާ ކުންފުނީގެ ވަފުދަކާއެކު ވުޒާރާގެ ފަންނީ ބޭފުޅުން ނިލަންދޫއަށް ދާ ގޮތަށް ހަމަޖެހިފައިވާކަމަށް މިނިސްޓަރ ވިދާޅުވިއެވެ. އަދި މިދަތުރުގެ މައިގަނޑު ބޭނުނަމީ ފ.ނިލަންދޫގައި މަސް ޕްރޮސެސިންގެ ފެސިލިޓީއާއި ކޯލްޑް ސްތޯރޭޖް ފެސިލިޓީ ޤާއިމްކުރުމަށް ސައިޓް މޮނިޓަރިން ކުރުން ކަމަށް މިނިސްޓަރ މައުލޫމާތު ދެއްވިއެވެ.

ފެނިގެންމިދިޔައީ ގުޅިގެން ކުރާ މަސައްކަތްތަކުގެ ނަތީޖާ ކާމިޔާބުވާނެކަމުގެ ކުޑަ މިސާލެއްކަމަށް ކައުންސިލްގެ ރައީސް އަލީ އަޙްމަދު ވިދާޅުވެއްޖެއެވެ. ނިމިގެންދިޔަ އަޟްޙާ ޢީދުގެ ކާމިޔާބީ ފާހަގަކުރުމާއި، އެކިގޮތްގޮތުން އެހީތެރިކަން ފޯރުކޮށްދެއްވި ފަރާތްތަކުގެ އަގުވަޒަންކުރުމަށް، ރޭ ގޮމަވަތީގައި ބޭއްވި ކުޑަ ޙަފްލާއެއްގައި ވާހަކަ ދައްކަވަމުން ރައީސް ވިދާޅުވީ، ”މަގޭރިންގެ ބޮޑު ޢީދު 1445“ ކާމިޔާބު ކަމާއެކު ކުރިއަށް ގެންދެވުނީ ވަރަށް ގިނަ ފަރާތްތަކެއްގެ މިންނެތް މަސައްކަތްތަކުން ކަމަށާއި އެކަމަށްޓަކައި އަދާކުރަންޖެހޭ ހައްގު ޝުކުރު އެފަދަ ކުޑަ ރަސްމިއްޔާތަކުން އަދާ ނުކުރެވޭނެކަމަށެވެ. މިގޮތުން އިދާރާތަކުގެ އިސްވެރިންނާއި ކުލަބު ޖަމްއިއްޔާތަކުގެ ވެރިންނާއި ޒުވާނުންގެ އިތުރުން ރަށުގެ އާންމުންގެ ފަރާތުންވެސް މިފަހަރުގެ ޢީދު ކާމިޔާބު ކުރުމަށް ގިނަ ގުނަ އެއްބާރުލުން ލިބުނުކަން ރައީސް ފާހަގަކުރެއްވިއެވެ. ”މި ނިމިދިޔަ ޢީދަކީ އިޖްތިމާޢީ ގޮތުން، މިހައި ބޮޑަށް އިދާރާތަކާއި އާންމުން ގުޅިގެން މިފަހުން ކުރެވުނު އެންމެ ރަނގަޅު މަސައްކަތް. އެހެންވީމާ އެކަން އެހައި ރަނޅަށް ދިޔައީ“ ރައީސް އަލީ އަހުމަދު ވިދަޅުވިއެވެ.

މިމޭރުމުން ވާހަކައްކަވަމުން ރައީސް އިތުރަށް ވިދާޅުވީ ރަށުގެ ތަރައްޤީއާ ގުޅޭ ކަންކަމުގައިވެސް ހުރިހައި އެންމެން އެކައްޗެއް ކިޔަންޖެހޭ ކަމަށާއި ރައީސްގެ ދައުރުގައި ބާކީ މިއޮތް މަދު ދުވަސްކޮޅުގައި ހުރިހައި ފަރާތްތަކަކުންވެސް ރައީސްއަށް އެއްބާރުލުން ދެއްވުމަށް އެދޭކަމަށެވެ. ”ރަށުގެ ނަރުދަމާގެ ކަންކަން މިއޮތީ ވަރަށް ގޯސްކޮށް، މިކަންވެސް ހަމައަކަށް އެޅުވުމުގައި އަޅުގަނޑު ބޭނުން ތިޔަ ހުރިހައި ފަރާތްތަކެއްގެ އެއްބާރުލުން. ދައުރުގައި ބާކީ މިއޮތް ދުވަސްކޮޅުވެސް ތަރައްޤީއާ ގުޅޭ މިފަދަ ކަންކަމުގައި ރައްޔިތުންގެ އެއްބާރުލުން ވަރަށް ބޮޑަށް ބޭނުން“ ރައީސް ވިދާޅުވިއެވެ. ނިލަންދޫގެ ތަރައްޤީއާ ގުޅޭ ކަންކަމުގައި ގިނަ މަސައްކަތްތަކެއް ކުރަން އެބަހުރި ކަމަށާއި ވަރުބަލި ވެގެން ފަހަތަށް ނުޖެހޭނެކަމަށް ރައީސް ވިދާޅުވިއެވެ.

1445ވަނަ އަހަރުގެ އަޟްހާ ޢީދު މިފަހަރު ތަފާތު ގިނަ ހަރަކާތްތަކަކާއެކު ވަރަށް ކުލަގަދަކޮށް ނިލަންދޫގައި ފާހަގަކޮށްފިއެވެ. ނިލަންދޫ ކައުންސިލްގެ ފަރާތުން ”މަގޭރިންގެ ބޮޑު ޢީދު 1445″ގެ ނަމުގައި މިއަހަރުގެ ޢީދު ފާޙަގަކޮށްފައިވަނީ ވަރަށްގިނަ ބައެއްގެ އެހީތެރިކަމާއެކުގައެވެ. އެގޮތުން ޒުވާނުންގެ ޓީމަކުން އިސްނަންގަވައި މިޢީދު ކުލަގަދަކޮށް، ރައްޔިތުންނަށް އުފާފާގަތި ޢީދެއްގެ ގޮތުގައި ގެނެސްދިނުމަށް ބޭނުންވެގެން ކައުންސިލްގައި އެދިފައިވާތީ މިފަހަރުގެ ޢީދުގެ ގިނަ ހަރަކާތްތަކެއްގައި ޒުވާންޓީމް އިސްދައުރެއް އަދާކުރާއްވާފައިވެއެވެ. މީގެ އިތުރުން ރަށުގައި ހުރި އިދާރާތަކުގެ ތެރެއިން، ފ.އަތޮޅު ކައުންސިލްގެ އިދާރާ، ފ.އަތޮޅު ހޮސްޕިޓަލް، ފ. ނިލަންދޫ މެޖިސްޓްރޭޓް ކޯޓު، ފ. ނިލަންދޫ ޕޮލިސް ސްޓޭޝަން، ފ.ފެމިލީ އެންޑް ޗިލްޑްރެންސް ސާވިސް ސެންޓަރ، ފެނަކަ ކޯޕަރޭޝަން، ނިލަންދޫ ޔޫތު ސެންޓަރ، އަދި ބޭންކް އޮފް މޯލްޑިވްސްގެ އިތުރުން އެމް.ޓީ.ސީ.ސީ ގެ ފަރާތުން އެހީތެރިކަން ލިބިފައިވެއެވެ. މީގެ އިތުރުން ބައެއް ކުލަބު ޖަމްއިއްޔާތަކުންވެސް މިއީދު ކުރިއަށް ގެންދިޔުމުގައި ބައިވެރިވެފައިވެއެވެ. އޭގެ ތެރެއިންވެސް ޑޭލައިޓް ކުލަބުންވަނީ ޚާއްސަ ދައުރެއް އަދާކުރައްވާފައެވެ.

މިއަހަރުގެ އަޟްހާ ޢީދު ނަމާދު ބޮޑު ޖަމާއަތުގައި ކޮށްފައިވާއިރު ނަމާދަށްފަހު ރައްޔިތުންނަށް ޢީދު ސައި ވަނީ ތައްޔާރުކޮށްފައެވެ. މި ހަރަކާތަކީ އާންމު ރައްޔިތުންގެ ވަރަށްބޮޑު އެއްބާރުލުމަކާއެކު ކޮންމެ އަހަރަކުވެސް ކުރިއަށް ގެންދެވޭ ހަރަކާތެކެވެ. ޢީދު ސަޔަށްފަހު ޢީދު ސަލާމްކުރުން ކުރިއަށް ގެންގޮސްފައިވެއެވެ. މި ޢީދު ސަލާމުގައި ރަށު ކައުންސިލްގެ ފަރާތުން ކޮންމެ ގެއަކަށްވަނީ ޢީދު ހަދިޔާއެއް ދެއްވާފައެވެ. މީގެ އިތުރުން، ޒުވާން ޓީމްގެ ފަރާތުން ދާނުގައި ތިއްބެވި ފަރާތްތަކަށް ޢީދު ތަހުނިޔާ ކިޔުމާއެކު ޢީދު ހަދިޔާއެއް ދެއްވާފައިވެއެވެ.

ޢީދާގުޅިގެން ކުރިއަށް ގެންދިޔަ ހަރަކާތްތަކުގެ ތެރޭގައި ދިވެހިންގެ ޘަގާފީ ހަރަކާތްތަކާއި މިޒަމާނުގެ ކުޅިވަރުތައް ހިމެނިފައިވެއެވެ. މިގޮތުން ޢީދު ބޮލަށް ގޮންޖެހުމާއި، ގޮންޖެހިފަރިވަޅު ދިނުމާއި، ފެންކުޅީގެ ހަރަކާތްތަކާއި ކޯޑި ކެނޑުމާއި، ބޮނޑި ކުޅުމާއި އީދު މާލޫދުކިޔުންފަދަ ދިވެހިންގެ ޘަގާފަތާ އާދަކާދަ ދައްކުވައިދޭ ހަރަކާތްތައް ހިމެނިފައިހުއްޓެވެ. އެހެން އަރަތުކާ ޚިލާފަށް މިއަހަރުގެ ޢިދުގައި ރަށުން ބޭރުން ތިން ޓީމެއް ގެނެސްފައިވެއެވެ، އެއީ ދަންމާނު ބޮޑުބެރު ގުރޫޕު، ފަތްމިނި ބޮޑުބެރި ގުރޫޕު އަދި ޔާރާ ޓީމްއެވެ.

މިފަހަރުގެ ޢީދުން ފެނިގެންދިޔަ ބައެއް ޚާއްޞަކަންކަމުގެ ތެރޭގައި ޢީދަށް ރަށަށް ޒިޔާތްތަކުރި މެހެމާނުންނަށް ރަތްދޫލައިގެ މަރުޙަބާއެއް ކިޔާފައިވާކަން ފާހަގަކޮށްލެވެއެވެ. އަދި މީގެ އިތުރުން ބިދޭސީންނަށް ޚާއްޞަކޮށްގެން ކުރިއަށް ގެންދެވުނު ކުރިކެޓު މެޗާއި، ވެޓަރެންސް ފުޓްބޯޅަ މެޗާއި، ކޯޑި ކެޑުންވެސް ވެގެންދިޔައީ ތަފާތު ކަމަކަށެވެ.

ޢިދުގައި ކުރިއަށް ގެންދިޔަ ހަރާކަތްތަކުގެ ތެރެއިން ގިނަބަޔަކަށް އެންމެ ކަމުދިޔަ ބައެއް ހަރަކާތްތަކުގެ ތެރޭގައި، ކުޑަކުދިންގެ ޕާކުގައި ކުރިއަށްދިޔަ ފެންކުޅީގެ ހަރަކާތާއި، ކުޑަކުދިންގެ ހަވީރާއި، މާލި ޕެރޭޑު ހިމެނެއެވެ. އަދި އީދުގެ ފަހުރޭގައި ޔާރާ ޓީމުން  ދީފައިވާ ޝޯއާއި، ޑޭލައިޓް، ހޮސްޕިޓަލް އަދި ރަށު ކައުންސިލް ގުޅިގެން ދިން ޝޯވެސް ވެގެން ގޮސްފައިވަނީ އާންމުންނަށް ވަރަށް ކަމުދިޔަ ހަރަކާތަކަށެވެ.

ފާއިތުވެދިޔަ ދެތިން އަހަރާ ޚިލާފަށް މިއަހަރުގެ ޢިދުގައި ދިވެހި ކުޅިވަރުގެ ގޮތުގައި ކުޅެވުނު، ބޮޑި އަދި ވާދެމުން ކުރިއަށް ދިޔައީ އިދާރާތަކުގެ މެދުގައި ކުރިއަށް ގެންދެވުނު މުބާރާތްތަކެއްގެ ގޮތުގައެވެ. މި ދެ ކުޅިވަރަށްވެސް އާންމުންގެ ވަރަށްބޮޑު ތަރުހީބެއް ލިބިފައިވެއެވެ.

މިއަހަރުގެ ޢިދަށް ރަށަށް ވަރަށް ގިނަ ފަރާތްތަކަކުން ޒިޔާރަތްކޮށްފައިވާއިރު ނިލަންދޫއިން ދިން މެހެމާންދާރީ ވަރަށް ފުރިހަމަކަމަށް އެންމެންވެސް ފާހަގަ ކުރެއްވިއެވެ. އަދި ނިލަންދޫގެ ރައްޔިތުންނަކީ ވަރަށް ހިތްހެޔޮ، އެކުވެރި ބައެއްކަން ފާހަގަވި ކަމަށް މި ޢީދަށް ރަށަށް ޒިޔާރަތްކުރި މެހެމާނުންވެސް ވަނީ ފާހަގަކުރައްވާފައެވެ.

ރައީސް ޑރ. މުހައްމަދު މުއިއްޒު އިއުލާން ކުރައްވާފައިވާ ފަސް މިލިއަން ގަސް އިންދުމަށް ޕްރޮގްރާމް ނިލަންދޫގައި ފަށައިފިއެވެ. މިކަމަށްޓަކައި އާސާރީ ބިމުގައި ކުރިއަށްދިޔަ ހަރަކާތުގައި ރަސްމިއްޔާތު ފައްޓަވައިދެއްވީ ނިލަންދެ އަތޮޅު އުތުރުބުރީ އަތޮޅު ކައުންސިލްގެ ރައީސާ ހައްވާ އަބްދުލް ޢަޒީޒެވެ.

ރާއްޖެ ފެހިކުރުމަށާއި ގަސްތަކުގެ މާހައުލީ ނިޒާމްތައް ރައްކާތެރިކޮށް ދެމެހެއްޓުމާއި މޫސުމީ ބަދަލުން ދިމާވާ ނުރައްކާތަކަށް ރާއްޖޭގެ ވިލުންތެރިކަން އިތުރުކުރުމަށްޓަކައި ފަސް އަހަރުގެ ތެރޭގައި، ފަސް މިލިއަން ގަސް ރާއްޖޭގެ އެކިކަންކޮޅުތަކުގައި އިންދުމުގެ މަޝްރޫއެއް ކުރިއަށް ގެންދިއުމަކީ އަދުގެ ރައީސްގެ ރިޔާސީ ވައުދެކެވެ.

ފަސް މިލިއަން ގަސް އިންދުމުގެ ޕްރޮގްރާމް މިއަދު ފެށީ އާސާރީ ސަރަހައްދުގަ އެވެ. އެ ސަރަހައްދުގައި ޖުމްލަ 117 ރުއް އިންދާފައިވާއިރު ގިނަ އަދަދަކަށް މެލޭޝިޔާ ރުއްވެސް އިންދާފައިވެއެވެ. އަދި ކުރިއަށް އޮތްތަނުގައި ރަށުގެ އެކި ސަރަހައްދުތަކުގައި މޭވާ އަޅާ ގަހާއި ހިޔާ ލިބޭ ގަހާއި ދިވެހި ބޭސްވެރިކަމަށް ބޭނުންކުރާ އެކި ބާވަތުގެ ގަސް އިންދުމަށް ވަނީ ނިންމާފައެވެ.

އެ ރަސްމިއްޔާތުގައި ނިލަންދޫ ކައުންސިލްގެ ރައީސާއި، މެމްބަރުންގެ އިތުރުން ކައުންސިލް މުވައްޒަފުންނާއި، ރަށުގެ ބައެއް އިދާރާތަކާއި ކުލަބު ޖަމްއިއްޔާތަކާއި ބައެއް އާންމު ރައްޔިތުންވެސް ބައިވެރިވެފައިވެއެވެ.

އާސާރީ ބިމުގައި އިންދާފައިވާ ރުއްތައް ރަނގަޅަށް ހެދެންދެން އެސަރަހައްދުގައި ކޮށިގަނޑު ޖަހައި ވަކިކޮށް، ރުއްތަކަށް ފެންދެވޭނެ އިންތިޒާމެއް ހަމަޖައްސަވާނެކަމަށް ކައުންސިލްގެ ރައީސް އަލީ އަޙްމަދު ވިދާޅުވިއެވެ.

ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން ރަށުގެ ގިނަ މަގުތަކެއްގައި ބޯކޮށް ފެންހެދި އެކަމުގެ ދަތި އުނދަގޫ ރައްޔިތުންނަށް ފޯރަމުންދާތީ، އެކަން ކުޑަކުރުމަށް ރަށުގެ މަގުތަކުގައި ވެލި ފެތުރުމުގެ މަސައްކަތް ފަށިފިއެވެ. ރައްޔިތުން ދިރިއުޅޭ ހިސާބުތަކުގައި ހުރި މަގުތަކުގެ ތެރެއިން، އެންމެ ފުރަތަމަ ވެލި ފަތުރާފައިވަނީ މަގުތަކުގައި ފެންހެދި އެކަމުގެ ސަބަބުން ޗަކަ ހެދި، ފެހި ޖަހާފައި ހުރި ސަރަހައްދުތަކުގައި ކަމަށް ކައުންސިލް މެމްބަރު އަޙްމަދު ސިޔާމް ވިދާޅުވިއެވެ. ވެލި ފެތުރުމުގައި ބޮޑަށް ސަމާލުކަން ދެނީ އާންމުންނަށް އެންމެ ދަތިވާގޮތަށް ހުރި ސަރަހައްދުތަކަށް ކަމަށާއި، މަގުތަކުގައި ފެންހެދުމުގެ ސަބަބުން އެކަމުގެ ދަތި އުނދަގޫ ފޯރާގޮތަށް ހުރި ހުރިހައި ސަރަހައްދެއްގައި ވެލި ފެތުރުމަށް މަސައްކަތް ކުރައްވާނެކަމަށް މެމްބަރު ސިޔާމް ވިދާޅުވިއެވެ.

”މިހާރުވެސް އާންމުންގެ ބައެއް ފަރާތްތަކުން އެބަ ޝަކުވާ ކުރޭ ދަތިވާތީ. ކައުންސިލުން މި މަސައްކަތް ކުރަނީ ރައްޔިތުންނަށް ހިނގާބިނގާވެ އުޅެލެވޭވަރަށް ނަމަވެސް މަގުތަކުގައި ވެލި ފަތުރާލެވޭތޯ.“ މެމްބަރު ސިޔާމް ވިދާޅުވިއެވެ.

ދިރާސީ އާއަހަރު ފެށުމާއެކު ސްކޫލު ސަރަހައްދަށް ގިނަ ބަޔަކު އެއްވެ މަޑުކުރާނެތީ، އިއްޔެ އެސަރަހައްދުގެ ބައެއް މަގުތަކުގައި ވެލި ފަތުރާފައިވާއިރު، މިއަދުވެސް ސްކޫލް ސަރަހައްދުގެ ބައެއް އެހެން މަގުތަކުގައި ވަލިފަތުރާފައިވެއެވެ.

މަގުތަކުގައި ވެލި ފެތުރުމުގެ މަސައްކަތްތަކުގެ ތެރެއިން މި ހަފްތާގެ އަންގާރަ ދުވަހު ކައުންސިލްގެ ގިނަ އިދާރީ މުވައްޒަފުންވެސް  މި މަސައްކަތުގައި ބައިވެރިވެގެން މަސައްކަތް ކުރިއަށްދާގޮތަށް މިހާރުވަނީ ނިންމާފައެވެ.

މޫސުން ގޮސްވުމުގެ ސަބަބުން ރަށުގެ ބޮޑު ބަނދަރު ސަރަހައްދުން އުދަ އަރައި އާންމުން ދިރިއުޅޭ ސަރަހައްދާ ހަމައަށް ލޮނުގެ އަސަރުކޮށް، ފެންބޮޑު ވުމުގެ ސަބަބުން ކޯރު ކަނޑައިގެން އެސަހަރައްދުގައި ފެންބޮޑުވުން ހުއްޓުވުމަށްވެސް މީގެ ދެދުވަހެއްކުރިން ވަނީ މަސައްކަތް ކޮށްފައެވެ.

މިހާރު ރަށުގައި ކުރިއަށްދާ ތަރައްޤީގެ އެކިއެކި މަޝްރޫތަކާ ގުޅޭގޮތުން މަޝްވަރާކުރެއްވުމަށް ކައުންސިލްގެ ފަރާތުން ހައުސިންގ މިނިސްޓަރ ޑރ. އަލީ ހައިދަރާ ބައްދަލުކުރައްވައިފިއެވެ. މި ބައްދަލުކުރެއްވުމުގައި ނިލަންދޫގެ އާބާދީއަށް އަންނަމުންދާ ބަދަލާއި، އެކަމުގެ ސަބަބުން ހައުސިން މަޝްރޫޢެއް ނިލަންދޫގައި ކުރިއަށް ގެންދިޔުމުގެ މުހިއްމުކަމުގެ މައްޗަށް އަލިއަޅުއްވާލައިވައި ކައުންސިލްގެ ރައީސް ވާހަކަދައްކަވާފައިއެވެ. އަދި ނިލަންދޫއަކީ އާބަން ސެންޓަރެއްގެ ގޮތުގައި ތަރައްޤީ ކުރައްވާނެކަމަށް ރައީސުލް ޖުމްހޫރިއްޔާ ޑރ.މުހައްމަދު މުޢިއްޒު އިޢުލާނުކުރައްވާފައިވާތީ، އެކަމުގެ ސަބަބުންވެސް އެކި ސަބަބުތަކާހުރެ ރަށަށް ހިޖުރަކުރަންބޭނުންވާ ފަރާތްތައް ގިނަވާނެކަން ފާހަގަކުރެއްވިއެވެ.

ނިލަންދޫއަކީ ފ.އަތޮޅުގެ ރަށްތަކުގެ އިތުރުން ދ.އަތޮޅުގެ ގިނަ ރަށްތަކަކާއި ދ.އަތޮޅުގައި ހުރި ގިނަ ރިސޯޓު ތަކަކުން ގިނަ ޚިދުމަތްތަކެއް ހޯދުމަށް އަންނަ ރަށެއްކަން ފާހަގަކުރައްވަމުން ކައުްނސިލްގެ ރައީސް ވިދާޅުވީ، މިހާރު ކުރިއަށްދާ އެއަރޕޯޓުގެ މަޝްރޫ ނިމުމާއެކު ގިނަބަޔަކު އިތުރު ޚިދުމަތްތައް ހޯދުމަށް ނިލަންދޫއަށް އަންނާނެކަމަށެވެ.

”މިހާރުވެސް ތައުލީމު ހޯދުމަށާއި، ރަށުގައި ވަޒީފާ އަދާކުރުމަށް އެކި ރަށްރަށުން މީހުން އައިސް ނިލަންދޫގައި ދިރިއުޅޭ“ ކައުންސިލްގެ ރައީސް އަލީ އަޙްމަދު ވިދާޅުވިއެވެ.

މި ބައްދަލުކުރެއްވުމުގައި، އާބަން ސެންޓަރެއްގެ ގޮތުގައި ނިލަންދޫ ތަރައްޤީ ކުރެއްވުމަށް ރައީސުލް ޖުމްހޫރިއްޔާ ނިންމާފައިވާތީ، ހައުސިން މިނިސްޓްރީން ވެސް، އެކި މަޝްރޫތައް ކުރިއަށް ގެންދިޔުގައި އެމަގުން މަސައްކަތްތައް ރާވަމުންދާނެކަން ހާމަކުރެއްވިއެވެ. އަދި ނިލަންދޫގައި ހައުސިން މަޝްރޫއެއް ކުރިއަށް ގެންގޮސްދެއްވާނެކަމަށާއި ކައިރި މުސްތަޤުބަލެއްގައި އެކަމުގެ އަމަލީ މަސައްތައް ފެށިގެންދާނެ ކަމުގެ ފެހި ސިގްނަލެއް މިނިސްޓަރ ވަނީ ދެއްވާފައެވެ.

ނިލަންދޫއިން ދިރިއުޅުމަށްޓަކައި ގޯތި ދޫކުރުމަށްޓަކައި އިޢުލާނު ކޮށްފައިވާއިރު، ހައުސިންގ މަޝްރޫއެއްގެ ދަށުން، ރޯ ހައުސް ނުވަތަ ފްލެއްޓެއް ލިބުމަކީ ޒުވާނުންގެ ތެރެއިން ގިނަ ފަރާތްތަކެއްގެ އުއްމީދެކެވެ.

އިދާރީ ހިންގުން ހަރުދަނާ ކުރުމަށާއި މުވައްޒަފުންގެ ގުޅުން ބަދަހިކުރުމަށް މިއަހަރު ކުރި ތަޖުރިބާ ދަތުރު ކުރެވުނީ ބޮޑުތިލަދުންމައްޗަށެވެ. މިގޮތުން ހއ ، ހދ ގެ 05 ރަށެއްގެ ކައުންސިލާ ބައްދަލުކޮށް ތަޖުރިބާ ހިއްސާކުރެވިފައިވާއިރު މީގެތެރޭގައި ކުޅުދުއްފުށީ ސިޓީ ކައުންސިލް ވެސް ހިމެނެއެވެ.

ފ.ނިލަންދޫ ކައުންސިލްގެ 19 މުވައްޒަފުން ހިމެނޭހެން ކުރި މިދަތުރުގައި އެންމެ ފުރަތަމަ ދިޔައީ ހދ.ހަނިމާދޫއަށެވެ. ހަނިމާދޫކައުންސިލާއެކު ކުރިއަށްދިޔަ ބައްދަލުވުމުގައި ކައުންސިލުން އާންމުންނަށް ފޯރުކޮށްދޭ ޚިދުމަތްތަކާ ގުޅޭގޮތުންނާއި އާމްދަނީ އިތުރުކުރުމަށް ކައުންސިލުން ރާވާ ކަންކަމާ ގުޅޭގޮތުން މައުލޫމާތު ބަދަލުކުރެވުނެވެ. އަދި ހަމައެހެންމެ ދިރިއުޅުމަށްޓައި ބަންޑާރަ ގޯތި ދޫކުރުމުގައި ހަނިމާދޫ ކައުންސިލުން އަމަލު ކޮށްފައިވާ ގޮތްތަކާއި ދިމާވި ކަންކަމުގައި ހައްލަކާހަމައަށް އާދެވުނު ގޮތާ ބެހޭގޮތުން މަޝްވަރާކުރެވިފައިވެއެވެ.

ހަނިމާދޫއަށްފަހު މި ދަތުރުގައި ހއ.އުތީމާއި، ބާރަށާއި ދިއްދޫއަށް ގޮސްފައިވެއެވެ. މިއިން ކޮންމެ ރަށެއްގެ ކައުންސިލާއެކުވެސް ބައްދަލުކޮށް، އިދާރީ ހިންގުން ހަރުދަނާކުރުމަށް ކުރިއަށް ގެންދާ ކަންކަމާއި، ކުނި މެނޭޖްކުރުމާ ގުޅޭގޮތުންނާއި، އާމްދަނީ އިތުރުކުރުމަށް ކައުންސިލުން ކުރިއަށްގެންދާ ކަންކަމާ ގުޅޭގޮތުންނާއި، ވަލުރުއްގަހަށް ބަދަލުދިނުމުގައި އަމަލުކުރާ ގޮތްތަކާ ގުޅޭގޮތުން މަޝްވަރާތައް ކުރިއަށް ގެންދެވުނެވެ. އުތީމަށް ކުރި ދަތުރުގައި، އުތީމުގައި ހުންނަ މުހައްމަދު ތަކުރުފާނުގެ ގަނޑުވަރުކޮޅު ބަލާލަން ދެވުނެވެ. ގައުމައްޓަކައި ބަޔަކު ވެފައިވާ މި މަތިވެރި ގުރުބާނީއަކީ އަގު ނުކުރެވޭނެ ގުރުބާނީއެއްކަމަށާއި، އެކަން މިއަދުވެސް ދެމެހެއްޓުމަށް މަސައްކަތް ކުރަންޖެހޭނެ ކަމަށް ކައުންސިލްގެ ރައީސް އަލީ އަޙްމަދު ވިދާޅުވިއެވެ. ގައުމަށް ޚިދުމަތްކުރުމުގެ މުހިއްމުކަމުގެ މައްޗަށް އަލިއަޅުވާލައި ވާހަކަ ދައްކަވަމުން ރައީސް އިތުރަށް ވިދާޅުވީ، ކައުންސިލްގެ މުވައްޒަފުންނަކީވެސް ރައްޔިތުންނަށް ޚިދުމަތްތަކެއް ފޯރުކޮށްދޭ ބަޔަކަށްވީހިނދު، އެކަމުގައި ވަރަށް ޒިންމާދާރު ވާނެޖެހޭނެކަމަށާއި، ތެދުވެރިކަމާއި އިޚްލާސްތެރިކަމާއެކު ވަޒީފާގެ މަސްއޫލިއްޔަތު އަދާކުރުން ވަރަށް މުހިއްމުކަމަށެވެ.

މި ތަޖުރިބާދަތުރުގެ އެންމެ ފަހު މަންޒިލަކަށްވީ، ހދ.ކުޅުދުއްފުއްޓެވެ. ކުޅުދުއްފުށީ ސިޓީ ކައުންސިލާއެކު ކުރިއަށްދިޔަ ބައްދަލުވުމުގައި ވެސް ގިނަ ކަންކަމާ ގުޅޭގޮތުން މަޝްވަރާތައް ކުރެވުނެވެ. އަދި ނިލަންދޫ ކައުންސިލަށް އެންމެ ފުރަތަމަ ބައްދަލުވީ ސިޓީ ކައުންސިލަކީ ކުޅުދުއްފުށީ ސިޓީ ކައުންސިލްކަން ފާހަގަކުރައްވަމުން ނިލަންދޫ ކައުންސިލްގެ ރައީސް ވިދާޅުވީ ކުޅުދުއްފުއްޓާ އަޅާބަލާއިރު ނިލަންދޫގެ އާބާދީ ކުޑަ ނަމަވެސް، ސިޓީ ކައުންސިލާ ބައްދަލުވެ ހިއްސާކުރެވުނު މައުލޫމާތުތަކުން، ނިލަންދޫގެ ތަރައްޤީއާއި ކުރިމަގު ބައްޓަން ކުރުމުގައި ގިނަ ތަޖުރިބާތަކެއް ލިބިގެން ގޮސްފައިވާ ކަމަށެވެ.

މިދަތުރު ނިންމަވާލެއްވުމަށްފަހު މުވައްޒަފުން އެނބުރި މާލެއައިސްފައިވަނީ މޭ 18ވީ ހޮނިހިރު ދުވަހުއެވެ.

ފ.ނިލަންދޫގައި އެޅުމަށް ސަރުކާރުން ނިންމާފައިވާ މަސް ފެކްޓަރީއާ ގުޅިގެން މިނިސްޓްރީގެ ޓީމަކުން ނިލަންދޫއަށް ވަޑައިގެން އެމަޝްރޫޢު ކުރިއަށް ގެންދާނެ ސަރަހައްދެއް ވަނީ ފާހަގަކޮށްފައެވެ. މިގޮތުން ”ކުޑަރަށް“ ހިމެނޭހެން މަސްކައްކާ ސަރަހައްދުން 7 ހެކްޓަރުގެ ބިނ، މަސްފެކްޓަރީ އެޅުމަށްވަނީ ފާހަގަކުރައްވާފައެވެ. އަދި އެސަރަހައްދުގައި ހުރި އާންމު ފަރާތްތަކުގެ ގުދަންތަކާއި މަސްކައްކާ ބިންތައް އެހެން ސަރަހައްދުތަކަށް ބަދަލުކުރުމަށް މިނިސްޓްރީއިން ވަނީ އެދިލައްވާފައެވެ.

މި މަސައްކަތުގެ ތެރެއިން ރަށުގައި މަސްކެއްކުމުގެ މަސައްކަތް ކުރައްވާ ފަރާތްތަކާ ބައްދަލުކުރައްވައި މި މައުލޫމާތު ވަނީ ހިއްސާ ކުރެވިފައެވެ. މި ބައްދަލުކުރެއްވުމުގައި މަސްކެއްކުމުގެ މަސައްކަތުގައި އުޅުއްވާ 05 ފަރާތުންވެސް ވަނީ ބައިވެރިވެލައްވާފައެވެ. ބައިވެރިންނާ ވާހަކަދައްކަވަމުން މަސް ފެކްޓްރީގެ އަމަލީ މަސައްކަތް ވީހާވެސް އަވަހަށް ފެށޭނެހެން ކަންކަން ތަރުތީބު ކުރެއްވުމުގެ ވިސްނުން ހުރި ކަމަށާއި އެމަސައްކަތް ފަށާނީ މަސްކެއްކުމުގައި މަސައްކަތް މިހާރު ކުރައްވަމުންދާ ފަރާތްތަކަށް އަދުލުވެރި ބަދަލެއް ދެއްވާފައިކަމަށް ކައުންސިލް މެމްބަރ އަޙްމަދު ސިޔާމް ވިދާޅުވިއެވެ. މި ބައްދަލުވުމުގައި މެމްބަރު އިތުރަށް ވިދާޅުވީ، ބަދަލު ދިނުމުގައި ދެވިސްނުމެއް ގެންގުޅުއްވާ ކަމަށާއި، އެއްގޮތަކީ މިހާރު މަސްކެއްކުމަށް ބޭނުންކުރަމުންދާ ތަންތަން އަގުމަގު ކުރުމަށްފަހު ފައިސާއިން ބަދަލުދިނުން ކަމަށެވެ. އަނެއް ގޮތަކީ، އަލަށް މަސްކެއްކުމުގެ މަސައްކަތް ކުރުމަށް ނިންމާފައިވާ ބިމުގައި އެމަސައްކަތް ކުރެވޭނެ ފެންވަރަށް، ރަނގަޅު ބަދިގެއާއި، ދަރު ރައްކާކުރާނެ ތަނަކާއެކު  ވަށާ އިންފާރު ލެވިގެން މަސްކައްކާ ހިއްކުމުގެ މަސައްކަތް ކުރާނެ ތަނެއް ކައުންސިލުން ތައްޔާރު ކުރުމަށްފަހު މަސްކައްކާ ފަރާތްތަކާ ހާވާލުކުރުން ކަމަށެވެ. މިދެގޮތުން، މަސައްކަތް އަވަސްވެފައި، ދައުލަތަށާއި މަސްކައްކާ ފަރާތްތަކަށްވެސް އެންމެ ރަނގަޅު ގޮތަކީ ދެވަނަ ގޮތްކަން ފާހަގަކުރައްވައި ސިޔާމް އިތުރަށް ވިދާޅުވީ އެންމެ ރަނގަޅު ގޮތުގައި މިކަން ކުރިއަށް ގެންދެވޭނީ ދެފަރާތްވެސް ގުޅިގެން ކަމަށެވެ.

ބައްދަލުވުމުގައި ބައިވެރިވި ބޭފުޅުން ވާހަކަ ދައްކަވަމުން، ކައުންސިލްގެ ފަރާތުން މިހާތަނަށްވެސް މަސްކެއްކުމުގެ މަސައްކަތް ކުރައްވާ ފަރާތްތަކާމެދު ކަންކަން ކުރައްވާފައިވަނީ ވަރަށް ރަނގަޅަށް ކަމަށާއި އެކަމަށް ޝުކުރު އަދާކުރައްވާ ކަމަށް ވިދާޅުވިއެވެ. އަދި ކުރިއަށް އޮތްތަނުގައިވެސް ކައުންސިލުން ރައްޔިތުންނާ ގުޅުންހުރި މިފަދަ ކަންކަމުގައި ދެރަގޮތެއް ނަހައްދާވާނެކަމުގެ ޔަގީންކަން އޮތްކަމަށް އެބޭފުޅުން ވިދާޅުވިއެވެ. މަސްކައްކާ ސަރަހައްދު ބަދަލު ކުރުމާގުޅޭގޮތުން ހުށައެޅުނު ދެ ޚިޔާލުގެ ތެރެއިން ތާޢީދު ކުރައްވަނީ ކޮންގޮތަކަށްތޯ ސުވާލުކުރެއްވުމުން 02 ގޮތުން ކުރެއް ކޮންމެ ގޮތެއްވެސް ރަނގަޅު ކަމަށާއި ކައުންސިލުން ނިންމާ ގޮތަކަށް އެބޭފުޅުން ތާޢީދު ކުރައްވާނެ ކަމަށް ވިދާޅުވިއެވެ. އަދި މަސްފެކްޓަރީގެ އަމަލީ މަސައްކަތް ވީހާވެސް އަވަހަށް ފެށޭނެ ދުވަހެއް ދެކެން ބޭނުންވާކަމަށް އެބޭފުޅުންވެސް ފާހަގަކުރެއްވިއެވެ.

ފ.ނިލަންދޫ ކައުންސިލްގެ ރައީސާއި އެރަށުގެ ބޭފުޅުންނާ ސްޓޭޓް މިނިސްޓަރ މުޙައްމަދު މުއްތަލިބު ބައްދަލުކުރައްވައިފިއެވެ. މި ބައްދަލުކުރެއްވުމުގައި އެ ރަށުގައި ޤާއިމުކުރުމަށް ރަޢީސުލްޖުމްހޫރިއްޔާ ޑރ. މުހައްމަދު މުޢިއްޒު އިޢުލާނުކުރައްވާފައިވާ މަސްފެކްޓަރީގެ އެންމެ ފަހުގެ މަޢުލޫމާތު މިނިސްޓްރީގެ ފަރާތުންވަނީ ޙިއްސާކުރައްވާފައެވެ.

މި ބައްދަލުކުރެއްވުމުގައި މި މަޝްރޫއުގެ ސަބަބުން މި ސަަރަޙައްދަށް އިޤްތިޞާދީ ބޮޑު ކުރިއެރުމެއް އަންނާނެކަމަށް ކައުންސިލްގެ ރައީސް އަލީ އަޙްމަދު ވިދާޅުވިއެވެ. އަދި މި މަޝްރޫޢަކީ ރަށާއި ދާއިރާއާއި މުޅި ސަރަޙައްދުގެ ތަރައްޤީއަށް ވަރަށް މުހިންމު މަޝްރޫއެއްކަމަށާއި މިކަމަށް ނިލަންދޫ ކައުންސިލާއި ރައްޔިތުންގެ ފުރިހަމަ އެއްބާރުލުން ލިބިގެންދާނެކަމަށް ކައުންސިލްގެ ރައީސް ވިދާޅުވިއެވެ.

ފ. ނިލަންދޫގައި މަސް ޕްރޮސެސްކުރާ ފެކްޓަރީ އާއި ކޯލްޑް ސްޓޯރޭޖް ގާއިމްކުރުމަށް ނިންމައި، ސަރުކާރުން އެކަން ނިލަންދޫ ކައުންސިލަށް ރަސްމީކޮށް އަންގާފައިވަނީ ނިމިދިޔަ ހަފްތާގެ ތެރޭގައެވެ. އަދި މި މަޝްރޫޢު ކުރިއަށް ގެންދާނެ ސަރަޙައްދަކާ ގުޅޭގޮތުންނާއި މަޝްރޫޢާ ގުޅޭ މުހިއްމު މަޢުލޫމާތުތަކެއް ހިއްސާކުރެއްވުމަށް ނިމިދިޔަ ހަފްތާގައި މިނިސްޓްރީގެ ޓީމެއް ނިލަންދޫއަށް ވަޑައިގަންނަވާފައިވެއެވެ. އަދި މަސްފެކްޓަރީ ގާއިމްކުރުުމަށް ގާތްގަނޑަކަށް 7 ހެކްޓަރުގެ ސަރަހައްދެއްވަނީ ފާހަގަކުރައްވާފައެވެ.

މިހާރުވެސް މި ސަރަހައްދުގައި މަސް ކިރާ ނިސްބަތަށް ބަލާއިރު އެންމެ ގިނަ އަދަދަކަށް މަސް ކިރަމުންދަނީ ފ.ނިލަންދޫއަށްކަމަށް ތަފާސް ހިސާބުތަކުން ދައްކައެވެ.