މިކައުންސިލާއި ދާރުލް ޤުރުއާން ވައްސުންނާއި ގުޅިގެން ކުރިއަށް ގެންދެވުނު ”ޖަނާޒާ ކޯސް ސެޓްފިކެޓް ލެވެލް 1 – އިން ރޫލްސް އޮފް ޖަނާޒާ ކޯހުގެ ނިންމުމުގެ ރަސްމިއްޔާތު 15 އޯގަސްޓް 2026 ވަނަ ދުވަހު ބާއްވައިފިއެވެ. މި ކޯހުގައި ޖުމްލަ 24 ބައިވެރިން ވަނީ ކާމިޔާބުކަމާއެކު ކޯސް ފުރިހަމަކޮށް ސެޓްފިކެޓް ހާޞިލުކޮށްފައެވެ.
މި ކޯހަކީ ރަށުގެ ރައްޔިތުންނަށް ޖަނާޒާގެ ކަންކަން އިސްލާމީ ޝަރީޢަތާ އެއްގޮތަށް، ރަނގަޅަށް ދަސްކޮށްދިނުމުގެ މަޤުޞަދުގައި ހިންގުނު ވަރަށް މުހިންމު ކޯހެކެވެ. މި ރަސްމިއްޔާތުގައި ކޯސް ފުރިހަމަކުރި ބައިވެރިންނަށް ވަނީ ސެޓްފިކެޓް ޙަވާލުކޮށްދީފައެވެ.
ކޯސް ނިންމުމުގެ މި ޚާއްޞަ ޖަލްސާގައި،ދާރުލް ޤުރުއާނ ވައްސުންނާގެ މަސްއޫލުވެރިޔާ ފ.ނިލަންދޫ އަތިރީގެ އަލްއުޘްތާޒު ޢަބްދުއްލަޠީފު އަޙްމަދު ވަނީ މިފަދަ ކަމެއް ރަށުގައި ކުރިއަށް ގެންދިއުމަށް އިސްނަންގަވައި، ފުރިހަމަ އެއްބާރުލުން ދެއްވިކަމައްޓަކައި ކައުންސިލްގެ ރައީސަށާއި ކައުންސިލް މެންބަރަށް ނުހަނު އިޚްލާޞްތެރިކަމާއެކު ޝުކުރު ދަންނަވާފައިވެއެވެ.
ހަމައެއާއެކު، މި ހަފްލާގައި ވާހަކަފުޅު ދައްކަވަމުން ނިލަންދޫ ކައުންސިލްގެ ނައިބު ރައީސް މުޙައްމަދު ނަޞީމްވަނީ މި ކޯސް ކާމިޔާބުކަމާއިކު ކުރިއަށް ގެންދިއުމުގައި ދެއްވި އެހީތެރިކަމަށާއި ދާރުލް ޤުރުއާން ވައްސުންނާ ގެ ފަރާތުން ކޮށްދެއްވި މަސައްކަތްތައް ފާހަގަކޮށް އެފަރާތައް ޝުކުރު އަދާކޮށްފައިވެއެވެ. މީގެ އިތުރުން، މި ކޯހުގައި ބައިވެރިވެ، ބޮޑު ޝައުޤުވެރިކަމަކާއެކު ކިޔަވައިވިދާޅުވި 24 ބައިވެރިންގެ މަސައްކަތް ފާހަގަކޮށް، ނިލަންދޫގައި މިފަދަ ޚިދުމަތެއް ދިނުމަށް އެ ބޭފުޅުން ދެއްކެވި ޚާއްޞަ ޝައުޤުވެރިކަމަށް ތަޢުރީފުކޮށްފައިވެއެވެ.
