ފ. ނިލަންދޫ މަސްމާރުކޭޓް ސަރަޙައްދު އާންމު ސާފުތާހިރުކަމުގެ މިންގަނޑާ ޚިލާފަށް ވަރަށް ބޮޑަށް ހަޑިވެފައިވާތީ، 2025 ޖަނަވަރީ 25 ވީ ހޮނިހިރު ދުވަހު، ކައުންސިލް މުވައްޒަފުން ނިކުމެ އެ ސަރަޙައްދު ސާފުކޮށްފިއެވެ.
ނިލަންދޫ ކައުންސިލުން މަޢުލޫމާތު ދެއްވިގޮތުގައި، މި މަސައްކަތް ކުރެވިފައިވަނީ މަސްމާރުކޭޓް ސަރަޙައްދު ދުވަހެއް ދުވަހަކަށް ހަޑިވަމުން ދިއުމާއި، ނުބައިވަސް ދުވުމާއި، ގުޅިގެންނެވެ. މި މަސައްކަތުގައި ކައުންސިލްގެ ގިނަ މުވައްޒަފުން ބައިވެރިވެފައިވާކަން ފާހަގަކުރެވެއެވެ.
”މަސްމާރުކޭޓް ސަރަޙައްދަކީ ރަށުގެ އެންމެ މުހިންމު އެއް ސަރަޙައްދު. އެހެންކަމުން މި ސަރަޙައްދު ސާފުތާހިރުކޮށް ބެހެއްޓުމަކީ ވަރަށް މުހިންމު ކަމެއް,“ ކައުންސިލްގެ އިސް މުވައްޒަފެއް ވިދާޅުވިއެވެ.
މީގެ އިތުރުން، މަސްމާރުކޭޓް އާންމުކޮށް ބޭނުންކުރާ ފަރާތްތަކާ ބައްދަލުކޮށް، ތަން ސާފުކޮށް ބޭއްވުމުގައި ފުރިހަމަ އެއްބާރުލުން ދިނުމަށް ކައުންސިލުން އެދިފައިވެއެވެ. މިބައްދަލުވުމުގައި ކައުންސިލުން އިސްނަގައިގެން މާރުކޭޓު ސާފުކޮށްފައިވާތީ އިފާކުރާކަމާއި އަދި ކުރިއަށް އޮތްތަނުގައި މި ސަރަޙައްދު ސާފުތާހިރުކޮށް ބެހެއްޓުމަށް އެއްބާރުލުން ދޭނެކަމަށް ބައްދަލުވުމުގައި ބައިވެރިިން ބުނެފައެވެ. އަދި އާންމުންނަށް ދަތިވާތީ، މަސްމާރުކޭޓް ސަރަޙައްދުގެ ކަރަންޓު ރަނގަޅުކޮށް، އިތުރު ލައިޓްތަކެއް ވެސް ހަރުކޮށްފައިވާކަން ކައުންސިލުން ހާމަކޮށްފައިވެއެވެ.
”މިއީ ހަމައެކަނި އެއްފަހަރު ކުރާ ކަމަކަށް ވެގެން ނުވާނެ. މަސްމާރުކޭޓް ސަރަޙައްދު ސާފުތާހިރުކޮށް ބެހެއްޓުމަކީ އަޅުގަނޑުމެން އެންމެންގެ ޒިންމާއެއް,“ ކައުންސިލްގެ ރައީސް ވިދާޅުވިއެވެ. އަދި އަބަދުވެސް މިސަރަޙައްދު ސާފުތާހިރުކޮށް ބޭއްވުމާއި މިނޫންވެސް ރަށުގެ އިޖްތިމާޢީ ސަރަޙައްދުތަށް ސާފުކޮށް ބޭއުވުމަށް ކައުންސިލުން ކުރަމުންދާ މަަސައްކަތަށް އެންމެންގެވެސް ބައިވެރިވުމާ އެއްބާރުލުން ބޭނުންވާކަމުގައި ނިލަންދޫ ކައުނސިލްގެ ރައީސް ވިދާޅުވެފައިވެއެވެ.
