ފ. ނިލަންދޫ ކައުންސިލް އިދާރާގެ ފަރާތުން ބޭއްވި 1448 ވަނަ އަހަރުގެ މުވައްޒަފުންގެ މަދަހަ މުބާރާތް ވަރަށް ފޯރިއާއި އެކު ރޭ ކާމިޔާބުކަމާއެކު ނިންމާލައިފިއެވެ.
މީގެ ކުރީ އަހަރުތަކާ ޚިލާފަށް މިއަހަރުގެ މުބާރާތް ރާވާލައިފައިވަނީ އޮފީހުގެ ވަކިވަކި ސެކުޝަންތަކުގެ ބަދަލުގައި، ކައުންސިލް މެންބަރުން، އިދާރީ މުވައްޒަފުން، ވޭސްޓް މެނޭމަންޓްގައި މަސައްކަތްކުރާ މުވައްޒަފުން، އ.ތ.މ.ކ ގެ މެންބަރުން އަދި މިސްކިތްތަކުގެ މުވައްޒަފުން އެކުލެވޭ ގޮތަށް 5 ގްރޫޕަކަށް ބަހާލައިގެންނެވެ. ވާދަވެރިކަމާއެކު އެކުވެރިކަން ބޮޑުކުރުމަށްޓަކައި، ކޮންމެ ޓީމަކަށްވެސް އެ ޓީމަށް ނިސްބަތްވާ ކައުންސިލް މުވައްޒަފުންގެ އާއިލާގެ މެންބަރަކަށް ވުމުގެ ޝަރުޠާއެކު 1 ފަރާތް ހިމެނުމުގެ ފުރުސަތު ދެވުނުއެވެ. ރޭގެ މުބާރާތުގައި ޖުމްލަ 5 ގްރޫޕް މަދަހަ އަދި ފަރުދީ ބައިގައި ޖުމްލަ 20 މަދަހަ ހުށަހަޅާފައިވެއެވެ.
މުބާރާތުގެ އެންމެ މޮޅު ގްރޫޕާއި އެންމެ މޮޅު ގްރޫޕް މަދަހައިގެ ޝަރަފު ހޯދީ ޓީމު ގަގުނަސް ތަރާނާއެވެ. ފަރުދީ ބައިން އެއްވަނަ ހޯދީ ޓީމު ހިއްވަރުގެ ޢަބްދުލްޖަލީލު އަޙްމަދު، ދެވަނަ ހޯދީ ޓީމު ގަގުނަސް ތަރާނާގެ ޔާޝާ ޢަބްދުއްރައްޒާޤު، އަދި ތިންވަނަ ހޯދީ ޓީމު ގުލިސްތާންގެ ޢަލީ އަޙްމަދެވެ.
ރޭ ކުރިއަށްދިޔަ މި މުބާރާތުގެ ޝަރަފުވެރި މެޙެމާނެއްގެ ގޮތުން ބައިވެރިވެވަޑައިގެންނެވީ ފާފު އަމާންވެހީގެ ޕޮލިޓިކަލް ޑިރެކްޓަރ އަޒްމީރާ އިބްރާހީމެވެ. މެޙެމާނުގެ ވާހަކަފުޅުގައި، މިފަދަ ހަރަކާތްތަކަކީ މުވައްޒަފުންގެ ހުނަރުވެރިކަން ފާޅުކޮށް، މަސައްކަތުގެ މާހައުލުން ބޭރުން އެކުވެރިކަން އާލާކޮށްދޭ މުހިންމު ކަމެއްކަން ފާހަގަކުރައްވައި، 20 ފަރުދީ ހުށަހެޅުމާއި 5 ގްރޫޕް ހުށަހެޅުން ތަރުތީބުވެގެންދިޔަ ގޮތަށް ތަޢުރީފުކުރެއްވިއެވެ.
މުބާރާތް ކާމިޔާބުކަމާއެކު ނިންމާލުމަށް އެހީތެރިވެދިން ޖަޖުން، ވޮލަންޓިއަރުން، އަދި ހުރިހާ ބައިވެރިންނަށް ކައުންސިލުން ޚާއްޞަ ޝުކުރެއް ދަންނަވާފައިވާއިރު، ކުރިމަގުގައިވެސް މިފަދަ ހަރަކާތްތައް ކުރިއަށް ގެންދާނެ ކަމަށް ކައުންސިލް އިދާރާއިން ހާމަކުރެއެވެ.
މުބާރާތުގެ އެންމެ މޮޅު ގްރޫޕާއި އެންމެ މޮޅު ގްރޫޕް މަދަހައިގެ ޝަރަފު ހޯދީ ޓީމު ގަގުނަސް ތަރާނާޓީމް
ަ
ފަރުދީ ބައިން އެއްވަނަ ހޯދި ޓީމު ހިއްވަރުގެ ޢަބްދުލްޖަލީލު އަޙްމަދު
ފަރުދީ ބައިން ދެވަނަ ހޯދީ ޓީމު ގަގުނަސް ތަރާނާގެ ޔާޝާ ޢަބްދުއްރައްޒާޤު
ފަރުދީ ބައިން ތިންވަނަ ހޯދީ ޓީމު ގުލިސްތާންގެ ޢަލީ އަޙްމަދު
