ނިލަންދޫއަށް ވަޑައިގެން، ނިލަންދޫގެ ތަރައްޤީގެ މަޝްރޫޢުތަކާ ގުޅޭގޮތުން އެމް.ޓީ.ސީ.ސީގެ ޑީ.އެމް.ޑީ އަޙްމަދު މުބީން ކައުންސިލާއިއެކު މުހިންމު މަޝްވަރާތަކެއް ބާއްވައިފި އެވެ. އެމް.ޓީ.ސީ.ސީގެ ޑެޕިއުޓީ މެނޭޖިންގ ޑިރެކްޓަރ އަޙްމަދު މުބީން ދާލު އަތޮޅަށް ކުރެއްވި ރަސްމީ ދަތުރުފުޅުގައި، ނިލަންދޫގައި ހިނގަމުންދާ މަޝްރޫޢުތައް ބައްލަވާލައްވައި، ރަށުގެ ރައްޔިތުންނަށް ދިމާވެފައިވާ ދަތިތަކަށް އަވަސް ޙައްލެއް ހޯދުމާ ގުޅޭގޮތުން ވަނީ ފުޅާދާއިރާއެއްގައި ވާހަކަދެކެވިފަ އެވެ.
ކައުންސިލް ރައީސްގެ ކަންބޮޑުވުންތައް: އާރް.ޓީ.އެލް ފެރީގެ ރޫޓުތަކާއި މަޝްރޫޢުތަކުގެ ދުވެލި
މި ބައްދަލުވުމުގައި ނިލަންދޫ ކައުންސިލްގެ ރައީސް ވަނީ ރަށުގެ ތަރައްޤީއަށްޓަކައި ހިނގަމުންދާ އަދި ފެށުމަށް ތައްޔާރުވަމުންދާ މަޝްރޫޢުތަކާ ގުޅޭ ގިނަ ކަންބޮޑުވުންތަކެއް ޚިއްސާކުރައްވާފަ އެވެ.
އާރް.ޓީ.އެލް ފެރީގެ ރޫޓުތައް މުރާޖަޢާކުރުން: ދާލު އަތޮޅުގެ ކައިރި ރަށްރަށުގެ ރައްޔިތުންނަށް މިހާރުގެ ރޫޓުތައް ހުރިގޮތުން ދަތުރުފަތުރަށް ބޮޑު ހޭދައެއް ކުރަންޖެހޭތީ، ރައްޔިތުންގެ އެދުމުގެ މަތިން އާރް.ޓީ.އެލް ފެރީގެ ރޫޓުތައް އަލުން މުރާޖަޢާކޮށްދިނުމަށް ރައީސް އެދިލެއްވި އެވެ.
މަޝްރޫޢުތައް އަވަސްކުރުން: އެމް.ޓީ.ސީ.ސީން ހިންގާ މަޝްރޫޢުތަކުގެ ދުވެލި މިހާރަށްވުރެ ހަލުވިކުރަންޖެހޭކަން ރައީސް ފާހަގަކުރެއްވި އެވެ. ޚާއްޞަކޮށް، އާ ފުލުހުންގެ އިދާރާ ޢިމާރާތްކުރުމުގެ މަސައްކަތް ވަރަށް ލަސްކޮށްދާ ދިއުމާއި، ރަށުގެ ބޮޑެތި މަގުތައް ހެދުމުގެ މަޝްރޫޢު ވީހާވެސް އަވަހަކަށް ފެށުން މުހިންމުކަމަށް ވިދާޅުވި އެވެ.
އެއާޕޯޓް ހިއްކި ބިމުގެ ހިމާޔަތް: އެއާޕޯޓަށް ހިއްކާފައިވާ ބިން ހިމާޔަތްކުރުމުގެ (ގޮނޑުދޮށް ހިމާޔަތްކުރުން) މަސައްކަތް ކުރިއަށްދާއިރު، ބޮޑު ހިލަ ހުސްވަމުންދާތީ އެކަމަށް އަވަސް ޙައްލެއް ބޭނުންވާކަން ފާހަގަކުރެއްވި އެވެ.
މީގެ އިތުރުން، އެމް.ޓީ.ސީ.ސީގެ އިޖުތިމާޢީ ޒިންމާގެ (CSR) ދަށުން ނިލަންދޫގައި ފަތާ ސަރަޙައްދެއް ތަރައްޤީކޮށްދީފައިވާތީ، ކައުންސިލް ރައީސް ވަނީ އެމް.ޓީ.ސީ.ސީގެ މެނޭޖްމަންޓަށް ޚާއްޞަ ޝުކުރެއް އަދާކުރައްވާފަ އެވެ.
ނަރުދަމާއާއި ކަރަންޓުގެ ޚިދުމަތް ރަނގަޅުކުރުމަށް ނައިބު ރައީސްގެ އިލްތިމާސެއް
ކައުންސިލްގެ ނައިބު ރައީސް ވަނީ ރަށުގެ އަސާސީ ޚިދުމަތްތަކުގެ ފެންވަރު މަތިކުރުމުގެ މުހިންމުކަމުގެ މައްޗަށް އަލިއަޅުވާލައްވާފަ އެވެ. އެގޮތުން، ނިލަންދޫއަށް ދިމާވެފައިވާ ނަރުދަމާގެ މައްސަލައާއި ކަރަންޓުގެ ޚިދުމަތަށް ދިމާވާ ބުރޫއެރުންތަކަށް ދާއިމީ ޙައްލެއް ހޯދުމަށް އެމް.ޓީ.ސީ.ސީގެ ޑީ.އެމް.ޑީ އަޙްމަދު މުބީންގެ ދާއިރާގެ ތެރެއިން ކޮށްދެވެންހުރި ހުރިހާ މަސައްކަތެއް ކޮށްދެއްވުމަށް ނައިބު ރައީސް އެދިވަޑައިގެންނެވި އެވެ.
ގޮންޖެހުންތަކާއެކުވެސް ސަރުކާރުން މަސައްކަތްކުރަނީ މަޝްރޫޢުތައް ނިންމަން: މުބީން
ޒޯން 1، 2 އަދި 6 ގެ މަޝްރޫޢުތަކާ ހަވާލުވެވަޑައިގެން ހުންނެވި އެމް.ޓީ.ސީ.ސީގެ ޑެޕިއުޓީ މެނޭޖިންގ ޑިރެކްޓަރ އަޙްމަދު މުބީން ވަނީ، ކައުންސިލުން ފާހަގަކުރި ކަންބޮޑުވުންތަކަށް އިޖާބަދެއްވާފަ އެވެ.
”ދުނިޔޭގައި ހިނގަމުންދާ ހަނގުރާމަތަކުގެ ސަބަބުން ބޭނުންވާ މުހިންމު ސާމާނުތައް ލިބުމުގައި ލަސްތަކެއް ވަމުންދޭ. އަދި ތެލުގެ އަގު އުފުލުމުގެ ސަބަބުން ކުންފުންޏަށް މާލީގޮތުން ބޮޑެތި ގޮންޖެހުންތަކެއް އެބަހުރި،“ މުބީން ވިދާޅުވި އެވެ.
މުބީން އިތުރަށް ވިދާޅުވީ، މިފަދަ މާލީ އަދި ލޮޖިސްޓިކަލް ދަތިތަކެއް ހުރިނަމަވެސް، ރައްޔިތުންނަށް ބޭނުންވާ ތަރައްޤީގެ މަޝްރޫޢުތައް ހުއްޓުމެއްނެތްގޮތެއްގައި ކުރިއަށްގެންގޮސް، ވީހާވެސް އަވަހަކަށް ނިންމުމަށް ސަރުކާރާއި އެމް.ޓީ.ސީ.ސީން މެދުކެނޑުމެއްނެތްގޮތެއްގައި ބުރަ މަސައްކަތްތަކެއް ކުރަމުންދާ ކަމަށެވެ. އަދި ނިލަންދޫގެ މަޝްރޫޢުތަކަށް ދިމާވެފައިވާ ހުރަސްތައް ނައްތާލުމަށް ޚާއްޞަ ސަމާލުކަމެއް ދެއްވާނެކަމުގެ ޔަގީންކަން އޭނާ ދެއްވި އެވެ.
