Category: Uncategorized

ނިލަންދޫ ތަރި ޤުރުއާން މުބާރާތް 1447 ގެ މިފަހަރުގެ ވެސް ޓައިޓަލް ސްޕޮންސާއަކީ ފ. ނިލަންދޫ ދާއިރާގެ ރައްޔިތުންގެ މަޖިލީހުގެ އިއްޒަތްތެރި މެމްބަރު ފާޠިމަތު ސަޢުދާއެވެ. ވޭތުވެ ދިޔަ 1446  ވަނަ އަހަރުގެ ނިލަންދޫ ތަރި ޤުރުއާން މުބާރާތުގެވެސް ޓައިޓަލް ސްޕޮންސަރ އަކީ ހަމަ ފާޠިމަތު ސަޢުދާއެވެ.

ނިލަންދޫ ކައުންސިލްގެ ފަރާތުން ނިލަންދޫ ކައުންސިލްގެ ރައިސް ޢަލީ އަޙްމަދު ވަނީ، ފ. ނިލަންދޫއަކީ މުޅި ރާއްޖޭގައިވެސް ޤުރުއާނުގެ ޢިލްމުގައި ފާހަގަކޮށްލެވޭ ދިވެހިރާއްޖެއަށް ޚިދުމަތްތެރި ދަރިންތަކެއް ތިބި ރަށަކަށް ވީހިނދު، ނިލަންދޫގެ ރައްޔިތުންގެ ހިތްތަކުގައި ޤުރުއާނަށް ލޯބިޖެއްސުމާއި އިސްލާމީ ވަޙްދަތު ފުޅާކުރުމަށް އެކަމަނާ ކުރައްވާ މަސައްކަތް ފާހަގަކޮށް ޝުކުރުއަދާކޮށްފައެވެ.

ނިލަންދޫ ތަރި ޤުރުއާން މުބާރާތަކީ ނިލަންދޫ ކައުންސިލްގެ 04 ވަނަ ދައުރުގައި އެންމެ އިސްކަމެއްދީގެން ރަށުގައި ކުރިއަށްގެންދާ އެއް ހަރަކާތެވެ. މި މުބާރާތަކީ އަންޒަމާނުއްސުރެ ފ. ނިލަންދުއަކީ ކީރިތި ޤްރުއާނަށް ލޯބިކުރާ ގިނަ އަދަދެއްގެ ރައްޔިތަކު ދިރިއުޅޭ ރަށަކަށް ވުމުން، ޤްރުޢާނުގެ އިލްމު ދިރުވައި އާލާކުރުމުގެ މާތް މަޤްސަދުގައި ފ. ނިލަންދޫ ކައުންސިލް އިދާރާއިން އިންތިޒާމުކޮށްގެން ކޮންމެއަހަރެއްގެވެސް ބަރަކާތްތެރި ރަމަޟާން މަހާ ދިމާކޮށް ބާއްވާ ޤުރްއާން މުބާރާތެކެވެ.

2026 ވަނަ އަހަރުގައި ނިލަންދޫ ކައުންސިލުން، މިއަހަރުގެ ގަސް އިންދުމުގެ ފުރަތަމަ ހަރަކާތް 06 ޖަނަވަރީ 2026 ވަނައަށް ވީ އަންގާރަ ދުވަހު ހަވީރު ކުރިއަށް ގެންގޮއްސިއެވެ. މި ހަރަކާތުގައި ނިލަންދޫ ކައުންސިލްގެ މުވައްޒަފުން ޖުމްލަ 31 ގަސް އިންދާ ގަސް ހިމާޔަތް ކުރުމުގެ މަސައްކަތްކުރިއަށް ގެންގޮސްފައިވެއެވެ. މިހަރަކާތުގައި ގަސްއިންދާފައިވާނީ ނިލަންދޫ ކައުންސިލުން މީހުން ދިރިއުޅުމަށް އަލަށް ގޯތި ދޫކޮށްފައިވާ ހިއްކި ސަރަހައްދުގައި އޮންނަ ޕާކުގެ ވަށައެވެ.  އަލަށް އާބާދުވާ ހިސާބުތަކުގައި ހިޔާ ލިބޭ ބޮޑެތިގަސްތައް އިންދުމަކީ ކައުންސިލުން ވަރަށް ބޮޑު އަޙައްމިއްޔަތު ކަމެއް ދޭކަމެކެވެ.

މޯލްޑިވްސް ޕެރަ އޮލިމްޕިކް ކޮމިޓީގެ ފަރާތުން ފ.ނިލަންދޫ ކައުންސިލާއި ބައްދަލުކޮށް 2026 ވަނަ އަހަރު ނިލަންދޫގައި ”ނިލަންދޫ ކައުންސިލް އޯޕަން ޕެރަ ބެޑްމިންޓަން ޗެމްޕިއަންޝިޕް“ ގެ ނަމުގައި މުބާރާތެއް ކުރިއަށް ގެންދިޔުމާއި ގުޅޭގޮތުން މަޝްވަރާކޮށްފިއެވެ.
މިބައްދަލުވުމުގައި ރާއްޖޭގެ އެކި ސަރަޙައްދުތަކުން އެކިއެކި ފިޒިކަލް ޑިސްއެބިލިޓީސްތައް ހުންނަ ފަރާތަކަށް ބައިވެރިވެވޭގޮތަށް ޔުނިފައިޑް ޑަބަލްސް ބެޑްމިންޓަން މުބާރާތެއް ކުރިއަށް ގެންދިއުމަށް މަޝްވަރާކުރެވުނެވެ. މިބައްދަލުވުމުގައި ދިވެހިރާއްޖޭގެ ޕެރަ އޮލިމްޕިކް ކޮމިޓީގެ ސެކެޓްރީ ޖެނެރަލް އަޙްމަދު މުޙައްމަދު ބައިވެރިވިއެވެ. އަދި ރާއްޖޭގެ އެކި ހިސާބުތަކުގައި އުޅޭ އިންޓަނޭޝަލަން ލެވެލްގެ ޕެރަ ބެޑްމިންޓަން މުބާރާތްތަކުގައި ވާދަކުރާ ކުޅުންތެރިން މި މުބާރާތުގައިވެސް ވާދަކުރާނެކަމުގެ މަޢުލޫމާތު ދެއްވިއެވެ.
މިފަދަ މުބާރާތެއް މިރަށުގައި ކުރިއަށް ގެންދަން ހަމަޖައްސާފައިވާއިރު، މިހާރުވެސް މިރަށުގެ ދަރިއެއް ކަމަށްވާ ފ. ނިލަންދޫ ވައިލެޓްމާގެ، ޢަބްދުއްލަޠީފް މުޙައްމަދަކީ އިންޓަނޭޝަނަލް ލެވެލްގައި ރާއްޖެ ތަމްސީލުކޮށް ކާމިޔާބީތައް ހޯދަމުން އަންނަ ފަރާތެކެވެ. އެގޮތުން 2019 ވަނަ އަހަރު ތައިލޭންޑުގެ ބެންކޮކުގައި ކުރިއަށްދިޔަ ސްޕެޝިއަލް އޮލިމްޕިކްސް އޭޝިއާ ޕެސިފިކްގެ، ޔުނިފައިޑް ބެޑްމިންޓަން ޗެމްޕިއަންޝިޕުގައި ވާދަކޮށް ދިވެހިރާއްޖެއަށް ލޯ މެޑަލް އެއް ހާސިލްކޮށް ދީފައިވާކަން ފާހަގަ ކުރެވެއެވެ. އަދި މީގެ އިތުރުން ޕެރަ އޮލިމްޕިކްސްގައިވެސް ލަޠީފްވަނީ ވާދަކޮށްފައެވެ.

ގޯލްޑަން ފުޓްސަލް ޗެލެންޖް 2025ގައި ފ. ނިލަންދޫގެ ފަރާތުން ބައިވެރިވާ ފުޓްސަލް ޓީމަށް ފ. ނިލަންދޫ ކައުންސިލްގެ ފަރާތުން ފައިސާގެ އެހީގެ ގޮތުގައި 25،000 (ފަންސަވީސް ހާސް) ރުފިޔާ ދީފިއެވެ. މި ފައިސާ ކައުންސިލުން ހަވާލު ކުރީ ފ. ނިލަންދޫ ފުޓްސަލް ޓީމު، މިފަހަރު ގޯލްޑަން ފުޓްސަލް ޗެލެންޖުގައި ރިޕްރެޒެންޓްކުރާ ފ. ނިލަންދޫ ސްޕަރ ޖެނެރޭޝަން ކްލަބްއާއެވެ. ކުލަބުގެ ފަރާތުން މިފައިސާއާއި ހަވާލުވީ ކުލަބުގެ ހަޒާންދާރު ހަސަން ނާޝިދުއެވެ.

ކުލަބުގެ ފަރާތުން އެސް.ޖީ.ސީގެ ރައީސް،  ވަޖީހު މޫސާވަނީ މިފަދަ ކަންކަމުގައި ނިލަންދޫ ކައުންސިލްގެ ފަރާތުން ލިބޭ އެހީތެރިކަމާއި އެއްބާރުލުން ފާހަގަކޮށް ނިލަންދޫ ކައުންސިލަށް ފަށްފަށުން ޝުކުރުއަދާކޮށްފައެވެ.

ނިލަންދޫ ކައުންސިލުން ޒުވާނުންނަށް އަމާޒުކޮށްގެން ޒުވާނުންގެ ކުރިއެރުމަށް ތަފާތު ހަރަކާތްތަކާއި ކުޅިވަރު މުބާރާތްތައް ކުރިއަށްގެންދެއެވެ. އެގޮތުން މިއަހަރުތެރޭގައި ޒުވާން ފިރިހެނުންނަށް ހާއްސަކޮށް ފުޓްސަލް މުބާރާތެއް އަދި އަންހެނުންނަށް ހާއްސަކޮށް ހޭންޑްބޯޅަ މުބާރާތެއްވެސްވަނީ ނިލަންދޫ ކައުންސިލްގެ ފަރާތުން ނިލަންދޫގައި ފުރަތަމަ ފަހަރަށްވަނީ ކުރިއަށް ގެންގޮއްސައެވެ.

ފ. ނިލަންދޫ ކައުންސިލުން ހިންގަމުންދާ އައްޑަނަ ތެޔޮ ފިހާރައިން ވިއްކާ ޕެޓްރޯލުގެ އަގު އަނެއްކާވެސް ހެއުކޮށްފިއެވެ. މިއަދުން ފަށައިގެން އައްޑަނަ ފިހާރައިން ޕެޓްރޯލު ލީޓަރަކުން 50 ލާރި އަގުހެޔޮވާނެއެވެ.

ކުރިން ޕެޓްރޯލް ލީޓަރެއް ލިބެންހުރީ 16.50 ރުފިޔާއަށެވެ. އެހެން ނަމަވެސް، ޕެޓްރޯލްއަގުތައް ރިވައިޒް ކުރުމަށް ފަހު، ކައުންސިލުން ވަނީ ޕެޓްރޯލް ލީޓަރެއް ވިއްކާ އަގު ހެޔޮކޮށްފައެވެ. އެގޮތުން، މިހާރު އައްޑަނަ ފިހާރައިން ޕެޓްރޯލް ލީޓަރެއް ލިބެން ހުންނާނީ 16.00 ރުފިޔާގައެވެ.

އެންމެފަހުން ޕެޓްރޯލް ލީޓަރެއްގެ އަގު ހެޔޮ ކުރީ މިދިޔަ ސެޕްޓެމްބަރ މަހުގެ 1 ވަނަ ދުވަހުގައެވެ. އެ ފަހަރުވެސް، ލީޓަރަކުން 50  ލާރި އަގުހެޔޮ ކުރިއެވެ.

ފ. އަތޮޅު ކައުންސިލްގެ ކްލަބް، ފޭސާރ އިން ރަށުގެ މުއައްސަސާތަކަށް އަމާޒުކޮށްގެން ކުރިއަށް ގެންދިޔަ އިންޓަރ އޮފީސް ގޭމްސް – ފުޓްސަލްގެ ޗެމްޕިއަންކަން ފ. ނިލަންދޫ ކައުންސިލްގެ ޓީމުން ހޯދައިފިއެވެ.

ގިނަ އަދަދެއްގެ ސަޕޯޓަރުންގެ ކުރިމަތީގައި، 28 ޑިސެންބަރު 2025 ވީ ބުރާސްފަތި ދުވަހުގެ ރޭ، ފ. ނިލަންދޫ ފުޓްސަލް ދަނޑުގައި ކުރިއަށްދިޔަ މިމުބާރާތުގެ ފައިނަލް މެޗުގައި ފ. ނިލަންދޫ ކައުންސިލްގެ ޓީމާއި ދެކޮޅަށް ކުޅުނީ ނިލަންދޫ ޕޮލިސް އަދި ފ. ފެމިލީ ސާވިސް ސެންޓަރުގެ ކޮމްބައިން ޓީމެވެ. ފޯރިގަދަ ކުޅުމެއް ފެނިގެން ދިޔަ މި މެޗު ފުރިހަމަ ވަގުތު ހަމަވި އިރު ނިމުނީ 2-2ކުން ދެ ޓީމް އެއްވަރުވެގެންނެވެ. ނިލަންދޫ ކައުންސިލްގެ 02 ލަނޑު ޖަހައިދިނީ އަޙްމަދު ސާޖިދު އަދި އަޙްމަދު ރިޒުވާން އިސްމާއީލްއެވެ. މެޗުގެ ނަތީޖާ ނެރުނީ ޕެނަލްޓީ ޖަހައިގެން 7-6 ސްކޯއަކުން ޕޮލިސް ކޮމްބައިން ޓީމުގެ މައްޗަށް ކުރިހޯދައިގެންނެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވުނީ ނިލަންދޫ ކައުންސިލް ޓީމުގެ ރިޒުވާނެވެ. މުޅި މުބާރާތުން އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ ނިލަންދޫ ކައުންސިލް ޓީމުގެ ފާރޫޤު އިސްމާއީލްއެވެ. މުޅި މުބާރާތުން އެންމެ މޮޅު 05 ކުޅުންތެރިންނަށް ހޮވުނީ ކޮމްބައިން ޓީމުގެ އާދިލް ޢަލީ އާއި ޕޮލިސް ކޮމްބައިން ޓީމުގެ މުޙައްމަދު ޚަލީލު އަދި ނިލަންދޫ ކައުންސިލް ޓީމުގެ 03 ކުޅުންތެރިން ކަމުގައިވާ ފާރޫޤު އިސްމާޢީލް، އަޙްމަދު ޢަލީ އަދި ގޯލް ކީޕަރު ޢަލީ ޞަބާޙު އެވެ. މުޅި މުބާރާތުގެ ހުރިހާ ގޮތަކުން އެންމެ މޮޅު ކުޅުންތެރިއަކަށް ހޮވުނީ ނިލަންދޫ ކައުންސިލް ޓީމުގެ ފާރޫޤު އިސްމާއީލްއެވެ.

ފ. ނިލަންދޫ ކައުންސިލްގެ މުވައްޒަފުން 12 ޑިސެމްބަރ 2025 ވީ ހުކުރު ދުވަހު، ހެނދުނު މަސްޖިދުއްތަޙާލުފި މިސްކިތު ގޯތި ތެރޭ ރުއް އިންދުމުގެ ޕްރޮގްރާމެއް ކުރިއަށް ގެންގޮއްސިއެވެ. މިގޮތުން މެލޭޝިއާ ރުކުގެ 53 ރުއް މިސްކިތުގެ ގޯތީގެ އެކި ހިސާބުތަކުގައި އިންދާފައިވެއެވެ.

5 މިލިއަން ގަސް އިންދުމުގެ ޕްރޮގްރާމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ތެރެއިން އެއް ވަޢުދުފުޅަށް ވާއިރު، މި ވަޢުދުފުޅުގައި ޙަޤީޤީ ކުލަޖެއްސެވުމަށް ގިނަ މަސައްކަތްތަކެއް ނިލަންދޫ ކައުންސިލްގެ ފަރާތުންވެސް ދަނީ ކުރަމުންނެވެ. މިގޮތުން ގަސް އިންދުމުގެ ތަފާތު އެތަކެއް ޕްރޮގްރާމެއް މިއަހަރުތެރޭގައިވެސް ނިލަންދޫ ކައުންސިލުން އިސްނަގައިގެން ނިލަންދޫގައި ކުރިއަށް ގެންގޮސްފައިވެއެވެ.

ފ. ނިލަންދޫގެ ފަންނަ މައިޒާނުގައި ”ފަންނަ ލައިބްރަރީ“ ގެ ނަމުގައި މިނީ އައުޓްޑޯރ ލައިބްރަރީއެއް ހުޅުވައިފިއެވެ. މި ލައިބްރަރީ ހުޅުވާދެއްވީ 08 ޑިސެމްބަރ 2025 ވަނައަށް ވީ ހޯމަ ދުވަހު ހަވީރުގެ ވަގުތެއްގައި ހައްދުއްމަތީ ކަލައިދޫ ކައުންސިލްގެ ރައީސް އަޙްމަދު ޝިޔާމް އެވެ.

ފަންނަ ލައިބްރަރީއަކީ ފ.ނިލަންދޫ ތަރިވިދާގޭ އަލްމަރުޙޫމާ މަރްޔަމް މޫސާގެ ހަނދާނުގައި 2025 ޑިސެމްބަރު 03 ވަނަ ދުވަހު އޭނާގެ ދަރިކަނބަލުން، ފ. ނިލަންދޫ ކައުންސިލްގެ 04 ވަނަ ދައުރުގެ އަންހެން މެމްބަރު އަލްފާޟިލާ ނަޝީދާ ޢަބްދުއްރަޙީމް، ފ.ނިލަންދޫ ކައުންސިލަށް ކޮށްފާއިވާ ހަދިޔާއެކެވެ. މި ލައިބްރަރީއަށް ކައުންސިލް މެމްބަރު ނަޝީދާ ޢަބްދުއްރަޙީމް، ޖުމްލަ 100 ފޮތް ކައުންސިލަށް ހަދިޔާކޮށްފައިވެއެވެ. މީގެ ތެރޭގައި ހިމެނެނީ އިނގިރޭސި ބަހުން ލިޔެފައިވާ 60 ފޮތާއި ދިވެހި ބަހުން ލިޔެފައިވާ 40 ފޮތެވެ. މި ފޮތްތަކުގެ ތެރޭގައި ކުޑަ ކުދިން އަދި ބޮޑެތި މީހުންގެ ވާހަކަ ފޮތްތަކާއި ތަފާތު މަޢުލޫމާތު އެކުލެވޭ ފޮތްތައް ހުރިކަން ފާހަގަ ކުރެވެއެވެ.

ކައުންސިލުން އެދެނީ މި ލައިބްރަރީ، ބޭނުންކުރާ ފަރާތްތަކުން ވީހާވެސް ޒިންމާދާރުގޮތެއްގައި ގިނަ ދުވަހަށް ދެމިހުންނާނެ ގޮތައް މި ލައިބަރަރީ ބޭނުންކުރުމެވެ. މިލަބްރީރަށް ފޮތް ހަދިޔާ ކުރަން ބޭނުންވާ ފަރާތްތަކަށް އެފުރުޞަތު އޮތްކަން ފާހަގަކުރަމެވެ.  މިފަދަ ލައިބްރަރީތައް ރަށުގެ މީހުން ޖަމާވެ އުޅޭ ހިސާބުތަކުގައި ބެހެއްޓުމަކީ ކައުންސިލްގެ އަމާޒެކެވެ.

ދިވެހިރާއްޖޭގައި ހުންނަ ސްރީލަންކާގެ ހައިކޮމިޝަނަރ މުޙައްމަދު ރިޒްވީ، 06 ޑިސެމްބަރ 2025 ވަނަ ދުވަހު،  ފ. ނިލަންދުއަށް ވަޑައިން ފ.ނިލަންދޫ ކައުންސިލާއި ރަށުގެ މުޙިއްމު މުއައްޞަސާތަކާއި ބައްދަލުކުރަށްވައިފިއެވެ.

ހައިކޮމިޝަނަރ މިރަށަށް ވަޑައިގަތީ ސްރީލަންކާގެ ސްޕެޝިއަލިސްޓް ޑޮކްޓަރުންގެ ޓީމެއްގެ އެހީގައި މިހިނގާ ޑިސެމްބަރ 22- 23 އަށް ފ.އަތޮޅު ހޮސްޕިޓަލުގައި މެޑިކަލް ކޭމްޕެއް ބޭއްވުމަށް ހޮސްޕިޓަލުން ތައްޔާރީތައްވަމުން ދަނިކޮށެވެ. މި މެޑިކަލް ކޭމްޕްގައި 7 ޑޮކްޓަރުންނާއި އެކު ޖުމްލަ 15 މީހުން ބައިވެރިވާނެ ކަމަށް މަޢުލޫމާތުލިބެއެވެ.

ކައުންސިލާއި ބައްދަލުކޮށް ދެއްކި ވާހަކަފުޅުގައި ސްރީލަންކާއަށް ދިމާވި ފެންބޮޑުވުމުގެ ހާދިސާގައި އެންމެ ބޮޑު އެހީތެރިކަމެއް ލިބުނު އެއް ޤައުމަކީ ދިވެހިރާއްޖެކަން ފާހަގަކޮށް އަދު ސަރުކާރަށާއި ދިވެހި ރައްޔިތުންނަށް ވަރަށް ހާއްސަ ޝުކުރެއް އަދާކުރިއެވެ.

ކައުންސިލާއި ދެމެދު ދެކެވުނު ވާހަކައިގައި މި ރަށުގެ ކައުންސިލްގެ މުވައްޒަފުންނަށް ކުދި ތަމްރީނު ޕްރޮގްރާމްތައް ލަންކާގެ އެކިއެކި އިންސްޓިޓިއުޓްތަކުން ހޯދައިދިނުމުގައި  ހައިކޮމިޝަންގެ ފަރާތުން އެހީތެރިކަން ފޯރުކޮށްދޭނެ ކަމަށާއި، އަދި ރަށުގެ މަގުބައްތިތައް ސޯލާ ހަކަތައް ބަދަލުކުރުމަށް ލުއި ގޮތެއް ކައުންސިލަށް ހޯދައިދިނުމަށް ސްރީލަންކާގެ ކުންފުނިތަކާއި މަޝްވަރާކުރާނެކަމަށް ވިދާޅުވިއެވެ.

އަދި މީގެ އިތުރުން ރަށުގެ ޒުވާނުންނާއި އަންހެނުން ބާރުވެރި ކުރުމަށް އެކިއެކި ވޮކޭޝަނަލް ޓްރެއިނިންގ ޕްރޮގްރާމްތަކާއި އަމިއްލައަށް ނަފާހޯދުމަށް އެހީވެދޭނެ ޕްރޮގަރާމްތައް ހިންގުމަށް ސްރީލަންކާއިން އިންސްޓްރަކަޓަރުން ފަސޭހަގޮތަކަށް ނިލަންދޫއަށް ގެނެސް މިފަދަ ޕްރޮގްރާމްތައް ހިންގުމަށް އެހީތެރިވެދޭނެ ކަމަށްވެސް ވިދާޅުވިއެވެ.

މިނިސްޓްރީ އޮފް ދިވެހި ލޭންގްއޭޖް ކަލްޗަރ އެންޑް ހެރިޓޭޖްގެ ފަރާތުން މެރިޓައިމް އޭޝިއާ ހެރިޓޭޖް ސާވޭ (MAHS)އާއި ޙަވާލުކޮށްގެން ކުރިޔަށް ގެންދާ މަޝްރޫޢުގެ ތެރެއިން ފ. ނިލަންދޫގެ އާސާރީ ސަރަޙައްދާއި އާސާރީ މިސްކިތާއި ގުޅޭ ތާރީޚުތަކާއި ގުޅޭ ދިރާސާ ކުރުމުގެ މަސައްކަތް ކުރުމަށް މިރަށަށް ވަޑައިގެންނެވި ޓީމުގެ ފަރާތުން ފ. ނިލަންދޫ ކައުންސިލްގެ މުވައްޒަފުންނަށް މަޢުލޫމާތު ދިނުމުގެ ސެޝަނެއް ކުރިޔަށް ގެންދަވައިފިއެވެ. މިސެޝަނުގައި އެޓީމުގެ ފަރާތުން ކުރަމުންދާ މަސައްކަތްތަކާއި ހޯދުންތަކައީ، ނިލަންދޫގައި ކުރާނެ މަސައްކަތްތަކުގެ މަޢުލޫމާތު ޙިއްސާ ކުރައްވާފައި ވެއެވެ. މިމަޢުލޫމާތުތައް ދެއްވާފައިވަނީ (MAHS) ޓީމުގެ ފަރާތުން ޑައިރެކްޓަރ ޕްރޮފެސަރ އާރ. މައިކަލް ފީނާ އާއި މޯލްޑިވްސް ނެޝަނަލް ސެންޓަރ ފޮރ ކަލްޗަރަލް ހެޓިޓޭޖްގެ ޓީމު ލީޑަރ އިބްރާހީމް މުޖާހެވެ.

މެރިޓައިމް އޭޝިއާ ހެރިޓޭޖް ސަރވޭ (MAHS) އިން މަސައްކަތްކުރަމުން ދަނީ ދިވެހިރާއްޖެ، ސްރީލަންކާ، އިންޑޮނޭޝިއާ، ބްރޫނާއީ، އަދި ވިއެޓްނާމްގައި ހުރި ތާރީޚީ އަދި އާކިއޮލޮޖިކަލް ސައިޓުތައް ސަރވޭ މަސައްކަތްތަކުގެ ތެރެއިން ޑިޖިޓަލްކޮށް ރެކޯޑްކޮށް ބެލެހެއްޓުމަށެވެ. މިތަނުން، އޮންލައިން އަރކައިވްގެ ތެރެއިން ޑޭޓާބޭސް ރެކޯޑުތައް، 3D މޮޑެލްތައް، ފޮޓޯތައް، އިމާރާތްކުރުމުގެ ޕްލޭންތައް (އާކިޓެކްޗަރަލް ޕްލޭންސް)، އަނގަބަހުން ކިޔާދީފައިވާ ތާރީޚީ ވީޑިއޯތައް (އޯރަލް ހިސްޓްރީ ވީޑިއޯސް)، ޑިޖިޓަލައިޒްކުރެވިފައިވާ ލިޔުންތައް (މެނުސްކްރިޕްޓްސް)، އަދި އެހެނިހެން ވަސީލަތްތައް ބަލައި ހޯދަމުން ގެންދެއެވެ.

މެރިޓައިމް އޭޝިއާ ހެރިޓޭޖް ސާރވޭ (MAHS) އަކީ، އޮކްސްފޯޑް ސެންޓަރ ފޯ އިސްލާމިކް ސްޓަޑީޒްގައި ކުރިއަށްގެންދާ މޯލްޑިވްސް ހެރިޓޭޖް ސާރވޭ ޕައިލެޓް މަޝްރޫޢުގެ މައްޗަށް ބިނާކޮށް، ދެކުނު އޭޝިއާގެ ކަނޑުގެ ސަރަޙައްދުގައި ހިމެނޭ ތާރީޚީ އަދި ގަދީމީ ތަންތަން ޑިޖިޓަލީ ރެކޯޑުކުރުމުގެ މަސައްކަތް ފުޅާކުރުމަށް ފަށާފައިވާ މަޝްރޫޢެކެވެ. މި މަޝްރޫޢުގެ ދަށުން، ސްރީލަންކާ، އިންޑޮނޭޝިއާ، ބުރުނާއީ އަދި ވިއެޓްނާމް ފަދަ ޤައުމުތަކުގައި އާ ސާރވޭ މަސައްކަތްތައް ހިންގަވަމުންދެއެވެ.
ސަތޭކަ ސުވާސަތީ އަހަރުތަކެއް ވަންދެން، ދެކުނު އޭޝިއާގެ ކަނޑުގެ ސަރަޙައްދުގެ މޫސުމީ ވިއްސާރަ ދައުރުތަކުގެ ސަބަބުން، މި ފުޅާ ކަނޑުތަކުގެ އެތެރޭގައި މީހުންނާއި، މުދާތަކާއި، ފިކުރުތައް ބަދަލުކުރުމަށް ފަސޭހަވެފައިވެއެވެ. މިކަމުގެ ސަބަބުން، ތަފާތު ބައިތަކެއްގެ މުއްސަންދި ސަޤާފީ މިޝްރީނެއް އުފެދިފައިވެއެވެ. ނަމަވެސް، މި މުއްސަންދި ތާރީޚާއި ގުޅިފައިވާ އެތައް މުހިންމު ތަންތަނާއި، ބިނާތަކާއި، އަދި ތަކެއްޗަށް ދުވަހުން ދުވަހަށް އަންނަނީ ކުއްލި ނުރައްކަލާ ކުރިމަތިވަމުންނެވެ. އެގޮތުން، ތިމާވެށީގެ ސަބަބުން ދިމާވާ ގުދުރަތީ ކާރިސާތަކުން ކަމަށްވާ، ތޫފާން، ސުނާމީ، ގޮނޑުދޮށް ހަލާކުވުން، ބިމުގެ ލެނބުން، އަދި ކަނޑުގެ ލެވެލް މަތިވުން ހިމެނެއެވެ. މީގެ އިތުރުން، އަވަސް އަދި ނާގާބިލު ތަރައްޤީއާއި ބިނާކުރުމުގެ ސަބަބުންނާއި، ބައެއް ފަހަރު ޤަސްތުގައި ކުރެވޭ ހަލާކުކުރުމުގެ އަމަލުތަކުގެ ސަބަބުންވެސް މި ތަންތަނަށް ނުރައްކާވާކަން ފާހަގަކުރެވެއެވެ.
މި ނުރައްކަލުގެ ހާލަތުގައިވާ ތަރިކަ ރައްކާތެރިކޮށް ޑޮކިއުމެންޓުކުރުމަށްޓަކައި، MAHS ގެ ފީލްޑް ޓީމުތަކުން ޑިޖިޓަލް ޓެކްނޮލޮޖީތައް ބޭނުންކުރެއެވެ. މިގޮތުން، ޖީ.ޕީ.އެސް/އާރު.ޓީ.ކޭ (ރިއަލް-ޓައިމް ކައިނެޓިކް) މެޕިންގ، ޑިޖިޓަލް ފޮޓޯގްރަފީ، ވީޑިއޯ، ސީ.އޭ.ޑީ (ކޮމްޕިއުޓަރ އެއިޑެޑް ޑިޒައިން) ޑްރޯވިންގސް އަދި އައި.އައި.އައި.އެފް (އިންޓަރނޭޝަނަލް އިމޭޖް އިންޓަރއޮޕަރަބިލިޓީ ފްރޭމްވޯކް) ސްޓެންޑަރޑް މެނުސްކްރިޕްޓް ޑިޖިޓައިޒޭޝަން، މީގެ އިތުރުން ވައިގެ މަގުންނާއި ބިމުން ލައިޑަރ ބޭނުންކޮށްގެން، ތާރީޚުޢިލްމުވެރިންނަށާއި، ދިވެހި ރައްޔިތުންނަށާއި، އަދި ތަރިކަ މެނޭޖްމަންޓްގެ ކެނޑިޑޭޓުންނަށް ފައިދާކުރާނެ މުހިންމު ރެކޯޑުތައް އުފައްދައެވެ. މީގެ އިތުރުން، އެހެނިހެން ބައިވެރި މުއައްސަސާތަކާއި ފަރުދުންގެ ފަރާތުން ހިއްސާކުރެވޭ ޑޭޓާ ސެޓްތައްވެސް އެއްގޮތްކޮށް، މި މަޝްރޫޢުގެ ޑޭޓާބޭސް މެދުވެރިކޮށް އެއްކުރެވޭނެ އިންތިޒާމު ހަމަޖައްސާފައިވެއެވެ. MAHS އިން އުފައްދާ ހުރިހާ ރެކޯޑުތަކާއި އެހެނިހެން ޑިޖިޓަލް ތަރިކަ މުދާ އޮންލައިންކޮށް މިތަނުން އާންމުންނަށް ފެންނަން ހުންނާނެއެވެ. އަދި މިތަކެތި ކިޔޯޓޯ ޔުނިވަރސިޓީ އާއި އޮކްސްފޯޑް ޔުނިވަރސިޓީގެ ލައިބްރަރީ ސިސްޓަމްތަކުގައި ދާއިމީކޮށް ރައްކާކުރެވިފައިވެއެވެ.